• Era residéncia Sant Antòni a obtengut era categoria verda que balhe eth departament de Salut dera Generalitat e que classifique aguest centre coma lòc sense residents contagiadi, dempús d’auer-se confirmat es resultats negatius des darrères pròves PCR que se les an realizat

Eth plan de desescalada enes residéncies de gent grana dessenhat peth departament de Salut dera Generalitat classifique aguesti centres per colors vermelh, iranja o verd, segontes es casi de coronavirus que i auesse. Era residéncia Sant Antòni de Vielha a obtengut, aguesta setmana, era categoria verda qu’indique qu’ei un centre sense contagis de COVID-19, dempús qu’es resultats des darrères pròves PCR realizades a toti es residents agen gessut negatius.

Per motius de seguretat des residents e professionaus, se mantieràn es protocòls vigents: es visites des familhes se mantien limitades a 30 menutes setmanaus, en espaci net abilitat, respectant es distàncies mercades e damb es dispositius de seguretat (mampares de policarbonat e mascaretes). Coma naua mesura, tostemp qu’era meteorologia e era situacion ac permeten, se facilitarà qu’aguestes visites poguen realizar-se en jardin.

Era conselhèra d’Igualtat, Salut e Benèster, Maria Vergés, afirme qu’aguesta “ei ua fantastica noticia dempús de mesi de fòrça preocupacion pera salut des residents”, e hig que: “açò a estat possible gràcies ath bon trabalh desvolopat per toti es professionaus dera residéncia e era collaboracion des familhes”.

D’un aute costat, encara non i a directrius des departaments de Salut e Trabalh, Ahèrs Sociaus e Familhes dera Generalitat entara redubertura deth centre de dia e, per tant, se mantierà barrat peth moment.