Vielha, 5 de juriòl de 2018.- Era sidra elaborada ena Val d’Aran per Arantast a participat enguan en Cider World Award laguens dera hèira CiderWorld que s’a celebrat en Frankfurt, Alemanha, qu’ei considerada era hèira mès importanta deth sector a nivèu mondiau. Enguan ena hèira i an estat presentes ath delà dera aranesa, 163 sidres procedentes de mes que 20 païsi, coma Anglatèrra, Japon, França, Espanha, Norvègia, U.S.A, Irlanda, Itàlia e Chequia.

Arantast foncione a compdar der an 2008 dedicada parciauments ara revalorizacion d’arbes de fruta ena Val d’Aran damb mès d’un centenat d’exemplars damb varietats ancianes o tradicionaus. Temps en darrèr, sustot en Baish Aran, i aueren importants plantacions de fruters. Ena poblacion de Les s’elaboraue damb ua grana premsa, chuc de poma que dempús se transformaue en sidra. Actuauments Arantast arrecuelh es pomes des arbes sense cap tractament, entà elaborar chuc, sidra, vinagre, vinagres de sidra maceradi e mostassa.

Entà obtier era sidra an hèt ua seleccion entre eth ric auviatge de varietats locaus de poma dera Val d’Aran e comarques pirenenques vesies.

Era mostassa d’Arantast, elaborada de grans de mostassa de cultiu ecologic, se pòt trobar entre d’auti en restaurant “Rasoterra”, considerat coma eth melhor restaurant vegetarian de Barcelona e d’Espanha qu’elabòre eth “Tartar d´algues, pickles i mill fermentat amb mostassa de la Val d´Aran”.

Fin finau era sidra d’Arantast que ei part des productes dera “Mèrca de Garantia dera Val d’Aran”, tanben ei protagonista dera revista “Cuina”, qu’era edicion deth mes de junh aufrís un ample reportatge sus es sidres elaborades en Catalonha.