• Es passadi dies 10 de gèr e 16 de hereuèr, era sindica d’Aran envièc dues cartes ath conselhèr d’Educacion dera Generalitat entà adreçar-li quauques preocupacions relacionades damb eth sistèma educatiu deth nòste territòri, especiauments damb çò qu’a a veir damb eth era nòsta lengua pròpria e era reculada qu’era prepausa de decrèt presentada hège respècte der usatge dera lengua enes curriculums escolars de primària e segondària, qu’eth Conselh Generau d’Aran considère intolerabla

Era sindica d’Aran, Maria Vergés, a volut mostrar aguest maitin eth sòn supòrt as reivindicacions deth sector educatiu aranés, que s’a higut ara grèva d’educacion convocada pendent aguesta setmana en tota Catalunya.

Era sindica a trasladat ath professorat aranés: “eth supòrt deth Conselh Generau d’Aran as reclamacions deth sistèma educatiu aranés, especiaument aqueres qu’an a veir damb era nòsta lengua pròpria, er aranés” e higie que: “a despièch de non auer competéncies en aguesta matèria, haram tot çò que sigue ena nòsta man entà seguir hènt a arribar es demanes des centres educatius d’Aran as administracions competentes”.

En aguest sens, Vergés dejà se metec en contacte damb eth Conselhèr d’Educacion dera Generalitat, Josep González Cambray, es passadi dies 10 de gèr e 16 de hereuèr entà mostrar era sua preocupacion en diuèrsi ahèrs qu’afecten ath sistèma educatiu dera Val d’Aran, coma eth repartiment d’ores d’aranés en brolhon deth decrèt d’ordenacion des ensenhaments dera educacion basica deth Departament d’Educacion, que cònste amassa damb es ores corresponentes ath catalan, qu’eth professorat que vò acreditar es conseishements oficiaus d’aranés ac age de hèr en apartat de lengües estrangères o que non se contèmple eth besonh d’aguest coneishement dera lengua entà curbir es diuèrses places damb incidéncia enes escòles araneses.