• Dempús qu’eth passat mes de noveme eth govèrn d’Aran registrèsse en Parlament era iniciativa legislativa entara modificacion dera disposicion addicionau dera Lei sus er emplec e aprenedissatge des lengües oficiaus en ensenhament non universitari, que suprimís eth caractèr de “lengua veïculara” der aranés, eth prumèr plen d’aguesta cramba debaterà e votarà aguest dimèrcles era proposicion de lei deth Conselh Generau d’Aran

Aguest dimèrcles, 25 de gèr entàs 15:00 ores, era sindica d’Aran, Maria Vergés, intervierà en Plen deth Parlament de  Catalunya entà deféner era proposicion presentada peth Conselh Generau d’Aran tà modificar era disposicion addicionau dera Lei 8/2022, deth 9 de junh, sus er emplec e aprenedissatge des lengües oficiaus en ensenhament non universitari, e assegurar juridicaments atau eth caractèr de lengua veïculara der aranés ena escòla.

En aguest sens, cau rembrembar qu’eth passat 22 de noveme era sindica d’Aran registrèc en Parlament era sollicitut de modificacion dera disposicion addicionau dera Lei entà qu’er aranés recupère eth caractèr de lengua veïculara e entà resòler eth conflicte de seguretat juridica generat entar aranés ena escòla. Ua iniciativa legislativa aprovada per unanimitat en Plen deth Conselh Generau d’Aran e damb eth supòrt dera Escòla Aranesa.

Aguesta intervencion e eth debat e votacion posterior poderà seguir-se en dirècte en un especiau de Lleida TV que començarà entàs 14:55 ores.