Parlament de Catalunya (Ramon Boadella).

• Era sindica d’Aran, Maria Vergés, a defensat aguesta tarde en Plen deth Parlament de Catalunya era Iniciativa Legislativa presentada pera maxima institucion aranesa entara modificacion dera Lei 8/2022, deth 9 de junh, sus er emplec e aprenedissatge des lengües oficiaus en ensenhament non universitari, qu’elimine eth caractèr de lengua veïculara der aranés ena escòla.

• Aguesta iniciativa, qu’a superat eth tramit deth debat ara totalitat a on s’an refusat es esmenes presentades per Vox e eth grop mixt, seguís ara eth tramit parlamentari entà èster aprobada enes pròplèu setmanes

Aguesta tarde, era sindica d’Aran, Maria Vergés, a defensat en Plen deth Parlament de Catalunya era Iniciativa Legislativa presentada pera maxima institucion aranesa entara modificacion dera Lei 8/2022, deth 9 de junh, sus er emplec e aprenedissatge des lengües oficiaus en ensenhament non universitari, qu’elimine eth caractèr de lengua veïculara der aranés ena escòla.

“Aué auem exercit era soberania politica d’Aran en Parlament de Catalunya entà deféner era Escòla Aranesa e era nòsta lengua pròpria coma veïculara e d’aprenedissatge, atau e coma a vengut estant es darrèri 40 ans” afirmaue era sindica d’Aran, en tot híger que: “deth Conselh Generau d’Aran estant arregraïm era volontat des grops parlamentaris tà esmenar quauquarren que metie en risc er aranés”.

Aguesta iniciativa a superat aué eth tramit deth debat ara totalitat a on s’an refusat es esmenes presentades per Vox e eth grop mixt, e ara seguirà eth tramit parlamentari entà èster aprobada enes pròplèu setmanes.

Ena sua intervencion, era sindica a manifestat que: “ er aranés ei lengua oficiau en Catalunya, ei lengua de Catalunya, e ei  per aquerò que volem que sigue equiparat ath catalan, de manèra justa e equitativa, non sonque en recorsi, senon tanben en aqueth reconeishement que mos permete senter-mos acompanhadi, suenhadi e sustot, comprenudi”.

Consulta aciu era intervencion dera sindica: Defensa IL lei lengües oficiaus escòla