• Eth Conselh Generau d’Aran amie a tèrme, en marc des sues competéncies, totes es accions possibles entà hèr front ad aguest increment de casi, autant a nivèu sanitari coma sociau, e pr’amor d’açò a contactat damb eth departament de Salut dera Generalitat entà conéisher quines previsions e mesures aplicarà entà afrontar aguest aument dera incidéncia en Aran

Era sindica d’Aran, Maria Vergés, s’a metut nauament en contacte aguesta setmana damb eth departament de Salut entà conéisher quines previsions a e quines possibles mesures a previst aplicar era Generalitat de Catalunya en nòste territòri deuant dera nauta incidéncia dera COVID-19 en Aran, pr’amor qu’eth Conselh Generau d’Aran non compde damb mès esturments ne competéncies entà aplicar mès mesures ne accions des que dejà aplique actuaument.

“S’aguest aument dera incidéncia en Aran se consolide, era pression espitalaria e era aplicacion en nòste territòri des possibles mesures de relaxacion des restriccions se veiran condicionades”, asseguraue era sindica d’Aran, en tot híger que: “è demanat tanben informacion sus era confirmacion dera preséncia dera variant britanica dera COVID-19 en territòri entà conéisher s’aguesta variant poirie explicar, en part, eth notable aument de casi positius, ua informacion que mos a confirmat pendent es darrères ores eth servici de vigilància epidemiologica deth departament de Salut”.

Atau madeish, era sindica d’Aran a sollicitat ath departament de Salut qu’avalòre d’aumentar eth nombre de dòsis de vacunes contra era COVID-19 qu’arriben en Aran entà “accelerar atau eth procès de vacunacion, en tot auer en compde qu’era vacuna ei eth melhor recors ena luta còntra eth virus e mos pòt ajudar a melhorar es nòstes donades, que mos placen coma eth territòri damb eth risc de rebròt mès naut de tota Catalunya”. En aguest sens, cau rebrembar qu’ager s’inicièc en Aran era campanha de vacunacion as grani depenents majors de 80 ans e que se contunhe damb era vacunacion ath professorat des escòles araneses.