• Aguest maitin, era sindica d’Aran, Maria Vergés, a recebut ena sedença deth Conselh Generau d’Aran ara conselhèra de Territòri dera Generalitat de Catalunya, Ester Capella, qu’a copresidit era Comission d’Urbanisme d’Aran

• Era sindica d’Aran a trasladat ara conselhèra eth besonh d’activar es trabalhs deth projècte de melhora dera carretèra C-28 comprometudi enes pressupòsti dera Generalitat de 2023 damb 1 milion d’euros entà que se pogue desvolopar enes pròplèu mesi

• Pendent era trobada, era sindica a tornat a trasladar era preocupacion deth Conselh Generau d’Aran pera grèu problematica en matèria de viuenda que trauèsse era Val d’Aran e a reclamat, d’un costat, ampliar er àmbit competenciau dera maxima institucion aranesa en aguest airau e, der aute, arténher eth compromís dera Generalitat entà solucionar aguest ahèr ath temps que se reconeishe Aran coma un territòri tensionat

Era sindica d’Aran, Maria Vergés, a recebut aguest maitin ena sedença deth Conselh Generau d’Aran ara conselhèra de Territòri dera Generalitat de Catalunya, Ester Capella, damb qui an tractat diuèrses qüestions qu’infloïsen de forma dirècta en territòri, coma era problematica dera viuenda o era mobilitat ena C-28, entre d’auti ahèrs. Ena amassada tecnica posterior, i a prenut part tanben eth conselhèr d’Abitatge e Agenda Urbana, Andreu Cortés.

“È expressat ara conselhèra Capella eth besonh qu’auem deth Conselh Generau d’Aran ençà de reactivar es trabalhs de melhora dera C-28 que dejà comencèrem a trabalhar ena passada legislatura entà poder resòlver es problèmes de mobilitat que presente aguesta via e transicionar a un modèl de mobilitat mès sostenibla”, afirmaue era sindica d’Aran, en tot rebrembar que: “es pressupòsti dera Generalitat de Catalunya entà enguan contemplauen ua partida d’un milion d’euros entà desvolopar eth projècte de melhora d’aguesta via, que demoram que pogue desvolopar-se ath long des pròplèu mesi”.

D’un aute costat, en aguesta trobada era sindica d’Aran a trasladat tanben “era preocupacion deth Conselh Generau d’Aran pera grèu situacion de manca de viuenda en Aran, qu’ei ua qüestion que reclame mesures urgentes e ena qu’era Generalitat a un papèr essenciau” e higie que: “dera maxima institucion aranesa ençà volem, d’un costat, sajar d’anar ampliant er ambit competenciau qu’era Lei mos permet entà èster proactius e trapar solucions a cuert termini que mos permeten anar destensionant era situacion actuau e, per un aute costat, tanben volem arténher eth compromís dera Generalitat, qu’ei qui a era competéncia exclusiva en matèria d’abitatge, entà trabalhar conjuntament ena regulacion des abitatges d’emplec toristic, qu’ei un des ahèrs que mos sature eth parc de viuenda e, qu’ath delà, non dèishe d’èster ua competéncia desleiau ath sector ostalèr”.

Era sindica d’Aran s’a emplaçat damb era conselhèra de Territòri a trabalhar conjuntament en aguest ahèr e a volut “arregraïr en prumèr lòc era visita dera conselhèra e era sua predisposicion entà tractar damb eth govèrn d’Aran aguestes qüestions primordiaus entara Val d’Aran”.