• Pendent era darrèra amassada periodica entre es Conselhs Comarcaus deth Naut Pirenèu e eth Conselh Generau d’Aran, qu’a auut lòc aué ena sedença deth govèrn aranés, s’a parlat damb eth president dera Generalitat sus era candidatura des JJOO d’iuèrn de 2030 e es presidéncies e era sindica an manifestat que non ven de besonh ua consulta mès, pr’amor qu’ei mandat parlamentari, s’an emplaçat entà trabalhar de forma conjunta entà evitar que aguest ahèr cree tensions entre territòris vesins e an reclamat qu’ena prepausa tecnica dera candidatura i age un repartiment equitatiu des pròves

Era sedença deth Conselh Generau d’Aran a acuelhut aguest maitin era amassada  periodica dera sindica d’Aran damb es presidéncies des Conselhs Comarcaus deth Naut Pirenèu.

Un des ahèrs principaus tractadi en aguesta amassada a estat era candidatura des Jòcs Olimpics d’iuèrn de 2030 en Pirenèu, punt dera orde deth dia qu’a compdat damb era preséncia telematica deth president dera Generalitat, Pere Aragonès, qu’a explicat en quin punt se trape era consulta ara ciutadania sus aguesta candidatura e les a demanat era sua opinion sus aguest ahèr.

Autant era sindica d’Aran coma es presidéncies des Conselhs Comarcaus deth Naut Pirenèu an trasladat ath president era sua opinion unanima que, ad aguestes nautades e dempús d’auer coneishut era prepausa tecnica dera candidatura, non ven de besonh era realizacion d’aguesta consulta mès que, en èster un mandat parlamentari, accepten era sua realizacion. Totun, an deishat clar qu’era sua  volentat ei evitar que se creen tensions entre territòris vesins per aguest motiu e defensen qu’aguesta consulta non sigue sonque entà demanar ara ciutadania s’ei a favor o en contra d’uns JJOO, senon que servisque entà parlar sus quin modèl de territòri se vò arténher.

Ath delà, tanben an matut dessús dera taula que vòlen qu’ena prepausa tecnica d’aguesta candidatura olimpica i age un repartiment equitatiu entre toti es territòris deth Naut Pirenèu e Aran, pr’amor qu’ua oportunitat d’aguestes dimensions ajudarie a generar er impuls en desvolopament sociau e territoriau qu’eth Pirenèu a de besonh entà projectar-se coma un territòri de referéncia a nivèu globau.

En aguesta amassada, deuant dera manca de solucions ara problematica deth transpòrt escolar enes comarques deth Naut Pirenèu, es Conselhs Comarcaus an tornat a posicionar-se en contra des directritzes deth Departament d’Educacion que les insten a crubar eth servici de transpòrt as alumnes d’ensenhament non obligatòris. An acordat contunhar trabalhant entà solucionar aguesta problematica e adreçar-se ath  conseller Cambray entà cercar solucions entà qu’eth departament reconsidère aguestes mesures entà aplicar-ne d’autes mès adients ara realitat d’aguesti territòris. En aguest sens, eth Conselh Generau d’Aran a mostrat tot eth sòn supòrt as Conselhs Comarcaus en aguesta demana tant legitima.

Fin finau, dempús de conéisher qu’en aguesti darrèri dies eth departament de Vicepresidéncia dera Generalitat premanís un Estatut des Municipis Ruraus e que dejà i a auut bèra amassada damb es Conselhs Comarcaus deth Naut Pirenèu, an demanat qu’aguest Estatut tengue en compde era vision des territòris de montanha e que se compde damb era participacion des territòris implicadi entara redaccion d’aguest docuement.