• Ager auec lòc en Tremp era amassada periodica des presidéncies des conselhs comarcaus des territòris pirenencs e dera sindica d’Aran, ena quau s’acordèc reclamar ara Generalitat eth desplegament dera Lei de Montanha, qu’ a de dotar as zònes de montanha d’un marc normatiu especific qu’age en compde es singularitats d’aguest tipe de territòris e qu’afavorisque eth sòn desvolopament socioeconòmic

Aguesta amassada, que se desvolope en marc de relacion e collaboracion qu’aguestes institucions an encetat es darrèri mesi, auec lòc en Tremp, sedença deth Conselh Comarcau deth Pallars Jussà, e i participèren era sindica d’Aran, Maria Vergés, e es presidéncies des conselhs comarcaus deth Pirenèu: Alta Ribagorça, Pallars Jussà, Pallars Sobirà e Urgell, en aguesta ocasion  era presidenta deth Conselh Comarcau dera Cerdanya non podèc assistir per motius d’agenda.

En aguesta amassada, s’acordèc reclamar de manèra conjunta ara Generalitat de Catalunya era aprobacion e entrada en vigor urgenta dera Lei de Montanha. En aguest sens, era sindica d’Aran e es presidéncies des Conselhs Comarcaus pirenencs insistissen ena importància d’aguesta lei entà dotar as zònes de montanha d’un marc normatiu especific qu’age en compde es singularitats d’aguest tipe de territòris e qu’afavorisque eth sòn desvolopament socioeconomic.

“Un des maxims objectius deth Conselh Generau d’Aran ei afiançar e melhorar eth nòste autogovèrn, mès tanben volem establir sinérgies e amassar esfòrci damb es territòris vesins en tematiques tant importantes coma ei eth desplegament dera Lei de Montanha, o ahèrs coma era diversificacion economica, era digitalizacion, es comunicacions o eth retorn dera gent joena entàs nòsti territòris,  rèptes e objectius que compartim.

En aguesta trobada se tornèc a regretar eth pòc desplegament territoriau qu’era Generalitat a amiat a tèrme aguesti darrèri ans enes territòris deth Pirenèu e era sindica insistic nauament en besonh qu’eth pròplèu govèrn dera Generalitat sigue mès empatic e leiau damb Aran e es sues institucions. Tanben s’acordèc demanar ua trobada urgent damb era Deputacion de Lleida entà conéisher quini projèctes a previst desvolopar enes comarques deth Pirenèu e Aran en relacion as futurs hons europèus que gestionarà, e entà sollicitar que dongue supòrt as iniciatives enes que dejà se trabalhen des d’aguesti territòris.