• Dempús de conéisher qu’era Generalitat estudie era demana d’Andorra e era comarca der Alt Urgell entà equiparar eth Principat damb aguesta comarca e lheuar es restriccions de mobilitat entre andús costats dera termièra, çò qu’aurà un impacte fòrça negatiu en sector toristic e economic aranés de non aplicar-se un tracte equitatiu damb Aran, era sindica d’Aran a adreçat ua carta ath president en foncions dera Generalitat de Catalunya

Era sindica d’Aran, Maria Vergés, s’a dirigit per carta ath president dera Generalitat en foncions, Pere Aragonés, entà reclamar que se reprengue era mobilitat entre era Val d’Aran e França, dempús de conéisher que Andòrra e es departaments francesi d’Arièja e es Pirenèus Orientaus dejà la repreneren eth passat 4 de deseme.

Era sindica d’Aran manifestaue ena carta adreçada ath president en foncions que: “èm totaument conscients dera situacion provocada pera COVID-19 e deth besonh d’aplicar es mesures e restriccions entà controlar eth virus, totun tanben consideram qu’ei de besonh que toti es territòris pogam compdar damb es madeishes oportunitats entà qu’era nòsta ciutadania hèsque front ad aguesta crisi damb es maximes garanties, sustot tanben en tot tier en compde qu’actuaument era Val d’Aran ei eth territòri damb mens risc de rebròt de Catalunya” e higie que “s’ena pròplèu amassada deth PROCICAT s’apròve era demana hèta autant per Andorra coma pera comarca der Alt Urgell e er Ajuntament de La Seu d’Urgell, s’a d’aplicar era madeisha mesura respècte ara Val d’Aran” pr’amor que d’ua auta forma “era Val d’Aran serie tractada de forma injusta e desiguau”.

Atau madeish, era sindica d’Aran remercaue era importància qu’era economia de frontèra a tath Baish Aran pr’amor que “compartís un espaci comun d’escambi de relacions laboraus, de servicis e, sustot, economiques, en tot hèr qu’eth sistèma socioeconomic d’aguesta part dera Val d’Aran depengue en gran mesura dera relacion damb França”, afirmaue ena sua missiva, en tot híger que: “pr’amor d’açò, demanam que, en tot seguir er exemple e demana d’Andòrra e er Alt Urgell, era Generalitat de Catalunya realize es gestions oportunes entà qu’aguesta formula se pogue aplicar tanben en Aran”.

En aguest sens cau rebrembar qu’eth conselhèr de Governacion deth Conselh Generau, Amador Marqués, dejà s’adrecèc per carta tanben ath conselhèr d’Accion Exterior, Relacions Institucionaus e Transparéncia dera Generalitat, Bernat Solé, ena qué sollicitaue armonizar es restriccions entre andús costats dera frontèra damb França.