• A trauès d’ua missiva adreçada ara presidenta dera CCMA, era sindica d’Aran a denonciat eth tracte tendenciós e mancat de rigor e realisme qu’aguest reportatge balhe ara Val d’Aran e era sua ciutadania, e a exigit que se prenen es accions oportunes entà reparar eth damnatge reputacionau provocat

Era sindica d’Aran, Maria Vergés, a adreçat ara presidenta dera Corporacion Catalana de Mejans Audiovisuaus (CCMA), Rosa Romà, ua carta ena qu’exprèsse eth mauestar deth govèrn d’Aran, e de bona part dera ciutadania aranesa, peth reportatge emetut en programa “Sense ficció” de TV3 sus era mòrt der os Cachou,  en tot exigir que se prenen es accions de besonh entà reparar eth damnatge reputacionau provocat ena Val d’Aran e era sua ciutadania.

“Consideram qu’eth tracte qu’aguest programa a dat ara Val d’Aran ei intolerable, tendenciós e mancat de rigor e de realisme” apunte era sindica ena sua missiva, en tot híger tanben que: “se retrate a Aran e as aranesi d’ua forma biaishada, sense hèr cap esmena as nombroses accions e inversions que s’an amiat a tèrme en matèria de sostenibilitat ambientau, de supòrt ara ramaderia e conviuença damb grani carnivors, e sense remarcar tanpòc qu’era poblacion d’ossi en Pirenèu a aumentat enquias 83 exemplars en 2023”.

Atau madeish, era sindica d’Aran a destacat qu’eth procès judiciau d’aguest cas encara non a finalizat e, per tant, non existís cap senténcia que ratifique era autoria des hèts, “causa qu’aguest programa a evitat nomentar de manèra totauments intencionada,  sense auer en compde er impacte sociau e personau qu’açò pòt comportar”, e a volut remercar que: “eth govèrn deth Conselh Generau d’Aran a mostrat tostemp eth mès escrupulós respècte as procediments judiciaus e, tanben, ara pressumpcion d’innocéncia, insistint en que, s’atau ac demòstren es pròves, s’a d’aplicar tot eth pes dera lei”.

En aguesta missiva, Vergés manifèste que: “diuèrsi des testimònis apareishudi hèn evident qu’aguest cas, que lamentam e condemnam, a estat emplegat coma forma d’escarni, damb un notable contengut ideologic, en tot alimentar era idèa d’ua Val d’Aran qu’arren a a veir damb era realitat” e hig: “era ciutadania aranesa, e eth govèrn d’Aran, an trabalhat tostemp, ara e abans, entà mantier un territòri viu, a on era gent pogue auer oportunitats entà desvolopar eth sòn projècte de vida e, ath delà, ac hèn suenhant e gestionant eth sòn entorn entà transmeter-lo as naues generacions”.