• Pendent aguestes visites, era sindica s’amassarà damb es alcaldes e alcaldesses de cada terçon e s’entrevistarà damb era ciutadania que, prèvia demana de cita, volgue amassar-se damb era e es conselhèrs e conselhères deth govèrn en cada terçon entà plantejar-les es ahèrs que considèren

Era sindica d’Aran, Maria Vergés, acompanhada pes conselhèrs e conselhères deth govèrn en cada terçon, encetarà enes pròplèu dies ua ronda de visites as diferents terçons dera Val d’Aran entà amassar-se damb es alcaldes e alcaldeses, recéber ara ciutadania qu’age bèth ahèr a expausar, e conéisher atau de prumèra man es besonhs de cada parçan.

“Un des ahèrs que volem potenciar ei era proximitat damb era ciutadania aranesa, conscients qu’era transparéncia e era comunicacion son qüestions clau entà, per un costat dar a conéisher eth trabalh qu’eth govèrn d’Aran amie a tèrme e, per aute, recéber es opinions e preocupacions des nòsti vesins e vesies” explicaue era sindica d’Aran, en tot híger que: “aguesta ère ua accion que hè dejà fòrça temps que volíem amiar a tèrme, mès que pr’amor dera pandèmia auérem d’ajornar enquia qu’era situacion sanitària se tornèsse mès estable”.

Aguest diuendres, 29 d’octobre, era sindica visitarà es terçons de Pujòlo e Arties e Garòs. Es persones que volguen mantier ua amassada damb era e damb es conselhèrs de govèrn en terçon, ac poiràn sollicitar en tot enviar un email a sindicatura@aran.org o telefonant tath 973 64 15 49.