• Aguest maitin a auut lòc era prumèra des trobades entre era sindica d’Aran e eth president dera EMD de Gessa, ena qu’an tractat diuèrsi ahèrs relacionadi damb era conservacion deth patrimòni e dera gestion territoriau

Era sindica d’Aran, Maria Vergés, a començat aguest maitin un torn de contactes damb es representants institucionaus deth territòri tà conéisher de prumèra man eth trabalh des ajuntaments e EDM e compartir damb eri es linhes de trabalh deth  Govèrn d’Aran.

“Eth Govèrn d’Aran vò potenciar era relacion damb es representants locaus deth nòste territòri, entà, d’un costat, conéisher era sua realitat d’ua manèra mès propèra e, der aute, impulsar era collaboracion institucionau a trauès des projèctes e accions qu’eth Conselh Generau d’Aran amie a tèrme”, manifestaue era sindica d’Aran, e higie que: “ei indispensable qu’es institucions araneses vagen dera man en aqueri ahèrs de país que permeten melhorar era vida dera nòsta ciutadania e hèr d’aguest, un territòri d’oportunitats e de futur”.

Era prumèra d’aguestes amassades a estat damb eth president dera EMD de Gessa, Sergio Ferrero, damb qui era sindica d’Aran a tractat ahèrs relacionadi damb era conservacion e proteccion deth patrimòni deth pòble e qüestions restacades damb era gestion territoriau.

Vielha, 26 de seteme 2024