• Era sindica, Maria Vergés, a hèt arribar ua carta ath president Aragonès entà tasladar-li era sua preocupacion pr’amor dera actuau situacion d’incertesa deuant dera possibla prorròga des pressupòsti dera Generalitat de Catalunya tà 2023

• Era prorròga des pressupòsti dera Generalitat implicarie tà Aran era pèrta de 3,8 milions d’euros, uns recorsi qu’eth Conselh Generau d’Aran a de besonh tà amiar a tèrme inversions en airaus clau tara Val d’Aran coma era sanitat, supòrt a ramaderia o eth desvolopament territoriau e qu’an un impacte dirècte ena qualitat de vida dera ciutadania

Era sindica d’Aran, Maria Vergés, a hèt arribar ua carta ath president dera Generalitat de Catalunya, Pere Aragonès, entà tasladar-li era sua preocupacion pr’amor dera actuau situacion d’incertesa deuant dera possibla prorròga des pressupòsti dera Generalitat de Catalunya tà 2023.

Atau e coma explique era sindica en aguest escrit: “er actuau acòrd de finançament vigent entre Generalitat e Conselh Generau d’Aran explicite, ena sua clàusula dusau, qu’eth Hons de Finançament Incondicionat incorporaue, a compdar de 2020, ua dotacion addicionau entà compensar ara Val d’Aran peth desvolopament des politiques pròpries, que supausaue ua quantitat de 570.000€ annaus enquia 2023, moment en qué s’acabe aguest acòrd de finançament”.

Pendent 2021, aguesta dotacion non siguec transferida ath Conselh Generau d’Aran pr’amor que, segontes argumentèc era Generalitat, en ua prorròga pressupostària coma era que i auec alavez, aguesta dotacion auie eth madeish tracte qu’eth Hons de Finançament Incondicionat (HFI), “quauquarren que dera maxima institucion aranesa ençà non compartíem”.

En aguest sens, Vergés afirme que: “ara, deuant d’ua possibla prorròga des pressupòsti dera Generalitat mos trobam deuant dera incertesa de tornar a patir un incompliment d’aguest acòrd de finançament que mos place deuant d’ua situacion fòrça delicada, nauaments, entà poder afrontar era gestion des nòstes competéncies”.

Era sindica apunte qu’uns naui pressupòsti ena Generalitat tà 2023, en compliment d’aguest acòrd de finançament que mandate qu’eth HFI s’a d’actualizar en foncion dera despena non finalista des departaments dera Generalitat, “suposarien entath Conselh Generau d’Aran un aument de 3’8 milions d’euros respècte de 2022, pr’amor der aument qu’era Generalitat de Catalunya preveiguie tàs sòns compdes en 2023” e hig que: “aguest aument pressupostari supòse tath Conselh Generau d’Aran poder amiar a tèrme inversions en airaus clau tara Val d’Aran coma son eth dera sanitat e era atencion sociau, era innovacion, eth supòrt ara ramaderia, era transicion energetica o era promocion der espòrt, entre d’auti, e qu’an un impacte dirècte ena qualitat de vida dera ciutadania e en desvolopament territoriau d’Aran, sustot en tot tier en compde que, sense aguesti recorsi, era gestion e era atencion as persones, serà encara mès complèxa e dificila deuant des rèptes e dificultats as que mos enfrontam enes pròplèu mesi”.

Era sindica d’Aran tanben a volut manifestar ath president era preocupacion deth govèrn d’Aran pes darrèri cambis amiadi a tèrme en govèrn dera Generalitat, en aguest sens, era sindica d’Aran explique que “deth govèrn d’Aran ençà, trabalham damb diuèrsi departaments dera Generalitat coma eth de Salut o Territòri, en ahèrs de vitau importància tath país coma era remodelacion der Espitau Val d’Aran, era adequacion dera carretèra C-28 o er aument de dotacion tà personau en urbanisme, entre d’auti. Uns departaments qu’enes darrères setmanes an cambiat de responsables politics, hèt que demoram non càmbie ne modifique es acòrds prèvis en aguesti airaus qu’an de perméter, tanben, ua melhora sinificativa tà Aran e era sua gent”.

Per aguesti motius, era sindica d’Aran a demanat ath president Aragnès qu’amie a tèrme “totes es gestions possibles entà qu’aguesti pressupòsti dera Generalitat tà 2023 poguen aprovar-se en brèu, entà balhar atau responsa as besonhs dera societat catalana e aranesa”.