• Era sindica d’Aran s’a amassat aguest maitin en Barcelona damb eth president dera Generalitat de Catalunya, a qui a presentat eth Plan de Govèrn d’Aran entàs pròplèu quate ans per çò que hè ath desvolopament dera Lei d’Aran e ath besonh de qu’eth Conselh Generau d’Aran compde damb un sistèma de finançament pròpri que balhe era estabilitat de besonh que permete qu’Aran pogue consolidar era sua autonomia politica.

Era sindica d’Aran, Maria Vergés, s’a amassat aguest meddia damb eth president dera Generalitat de Catalunya, Pere Aragonès, en Palau dera Generalitat, en Barcelona.

En aguesta amassada, era sindica d’Aran a presentat es objectius deth  Govèrn d’Aran en matèria de desvolpament institucionau tad aguesta legislatura. Aguest Plan de Govèrn ei “era huelha de rota a seguir pera maxima institucion aranesa enes pròplèu quate ans entà encarar es rèptes de futur que se mos presenten e entà poder desvolopar es maximes quòtes d’autogovèrn a trauès deth desplegament efectiu dera Lei de Regim Especiau d’Aran”.

Sus aguesta Lei, era sindica d’Aran a manifestat ath president Aragonès er interès deth govèrn d’Aran d’amiar a tèrme ua modificacion entà poder adaptar-la as besonhs e realitat actuaus dera Val d’Aran. En aguest sens, Vergés afirmaue que: “entà nosati ei primordiau qu’era Lei de Regim Especiau pogue desvolopar-se enes ambits competenciaus que mandate entà consolidar eth nòste autogovèrn, tà atau hèr reauments efectiva ua gestion dera proximitat ençà qu’age coma objectiu méter as persones en centre des accions e des politiques”.

Atau madeish, Vergés a trasladat ath president eth besonh “trascendir as acòrds periodics de finançament e crear un modèl damb  un sistèma de finançament pròpri que dongue estabilitat e seguretat ath govèrn d’Aran entath desvolopament des sues competéncies e, sustot, tà consolidar eth nòste autogovèrn”, quauquarren qu’actuauments se debat en sen dera Ponéncia Mixta de Convènis e Traspassi entre andús govèrns.

Era sindica a arregraït era predisposicion deth president entà tractar toti aguesti ahèrs de manèra conjunta e bidireccionau.