• Eth Conselh Generau d’Aran a defenut deth prumèr moment estant qu’aguesta candidatura tàs JJOO d’iuèrn de 2030 auie d’èster conjunta entre Catalunya e Aragon e era negativa deth president Lambán a ratificar er acòrd, dempús d’auer-se consensuat per comission tecnica damb eth vist-e-platz des representants d’andús territòris, represente un mensprètz e ua desleiautat ara Val d’Aran e ath conjunt deth Pirenèu
Dempús de coneisher-se aguest maitin qu’eth president d’Aragon, Javier Lambán, s’a negat a assistir tara amassada damb eth Comitè Olimpic Espanhòl e eth govèrn dera Generalitat de Catalunya, tà ratificar er acòrd politic dera candidatura olimpica, era sindica d’Aran, Maria Vergés, a manifestat era sua “totau decepcion damb era actitud deth president Lambán” qu’a qualificat coma “d’ua irresponsabilitat impròpria d’un representant public e que lo harà passar ara istòria coma eth responsable de qu’eth Pirenèu pèrde ua oportunitat unica entath sòn futur”.
Aguest deluns passat eth COE oficializaue er acòrd tecnic sus eth projècte dera candidatura tàs JJOO d’iuèrn de 2030, un acòrd que compdaue damb eth vist-e-platz des representants catalans e aragonesi que formauen part dera comission tecnica, atau e coma an manifestat publicament eth pròpri COE e eth president dera RFEDI. Totun, e de forma sorprenenta, eth president d’Aragon s’a posicionat en contra d’aguest acòrd per considerar-lo pòc equitatiu entre territòris, tot e qu’es informacions disponibles sus eth repartiment de pròves plantegen qu’Aragon compdarie damb 13 pròves mès que Catalunya.
“Non se compren aguest posicionament en un moment clau tà barrar aguesta candidatura dempús de mesi de convèrses e negociacions” a declarat era sindica d’Aran que higie que “en arren ajuden postures pòc collaboratives que çò unic que provòquen ei tensions bric de besonh entre territòris. Ei essenciau qu’es representants publics deishem de costat es nòstes filies e fòbies personaus entà trabalhar per arténher eth ben comun”.
Era sindica tanben a declarat que “coma sindica d’Aran è defenut tostemps, e eth pròpri plen deth Conselh Generau d’Aran ac a aprovat tanben, qu’aguesta auie d’èster ua candidatura conjunta entre Catalunya e Aragon que possibilitèsse qu’eth Pirenèu auesse ua oportunitat istorica tà posicionar-se e impulsar es nòstes infraestructures, ena nòsta projeccion internacionau, atau com era metuda ath dia des installacions esportives presentes ena Val d’Aran, e èster eth motor entara consolidacion d’un modèl de desvolopament sostenible ambientau, economic, sociau e territoriauments”, atau madeish tanben a volut destacar que “era Val d’Aran a mantengut ua relacion istorica damb Aragon que trabalharam tà conservar, totun, damb aguest mensprètz deth govèrn d’Aragon se daurís un abantes e un dempús enes relacions institucionaus damb aguesta comunautat”.
Era sindica d’Aran a anonciat tanben que demanarà ath COE que considère cercar d’autes alternatives deuant dera negativa d’Aragon entà qu’era candidatura sigue possibla e que se hig ath posicionament conjunt compartit pes representants des govèrns espanhòl e catalan e peth COE ena ròda de premsa realizada aguest maitin dempús dera trobada mantenguda entre eri e ena que non a assistit Aragon.
Vielha, 1 d’abriu de 2022