• Aguest congrès amasse pendent es dies 23 e 25 de seteme en Aínsa as principaus agents publics, privats e sociaus des territòris de montanha de tota Espanha entà debàter era situacion actuau d’aguesti municipis e estudiar es accions de besonh entà melhorar era vida des sòns abitants, frenar eth despobament e generar desvolopament economic e sociau

Era sindica d’Aran participe pendent es dies 23 e 25 de seteme en 5au congrès de esMontañas “Territòris de montanha: eth rèpte dera coesion” que se celèbre en Aínsa e qu’amasse as principaus agents privats, publics e sociaus des pòbles de montanha de tot eth territòri espanhòu que debaten e estúdien era situacion actuau e futura a trauès de casi reaus d’exit.

Era sindica, coma secretaria generau d’esMontañas, a presentat era ponéncia “Present e futur des pòbles de montanha: coma hèr dera adversitat ua oportunitat”, a cargue deth fondador deth Grop Barrabés, Carlos Barrabés.

Aguest congrès compde damb era preséncia e participacion deth secretari generau entath Rèpte Demografic, Francés Boya, e eth president dera Deputacion d’Òsca, Miguel Gracia, entre d’auti expèrts en ruralitat e representants des territòris de montanha de tota España

Cau rebrembar qu’eth Conselh Generau d’Aran exercís era secretaria generau d’esMontañas der an 2020 ençà. Aguesta associacion neishec en an 2013 damb er objectiu d’amassar as municipis de montanha de tot er estat, reivindicar es sòns besonhs e prebotjar es melhores legislatives e es accions que de besonh entà melhorar era vida des vesins e vesies d’aguesti territòris, frenar eth despoblament e generar desvolopament economic e sociau en aguesti endrets.