Era sindica d’Aran participe ena Trobada Iberica Internacionau sus era cooperacion transtermièra en zònes de montanha

Aguest maitin era sindica d’Aran a prenut part d’aguesta jornada organizada pera associacion esMontañas en Candelario (Salamanca), que supause ua oportunitat entà intercambiar informacion e experiéncies e desvolopar estrategies comunes entre es territòris de montanha d’Espanha, Itàlia, Portugal e França entara dinamizacion e visibilizacion des rèptes d’aguesti territòris

Era sindica d’Aran, Maria Vergés, a participat aué ena Trobada Iberica Internacionau organizada pera associacion esMontañas en Candelario (Salamanca), en ua taula de debat sus es montanhes d’Euròpa, damb João F. Rolo, president d’ADIRAM (Associaçao de Desenvolvimento Integrado da Rede das Aldeias de Montanha), Nicolas Evrard, assessor de montanha en Ministèri dera Transicion Ecologica e dera Coesion des territòris en Govèrn de França, e damb Marco Bussone, president dera Associacion Italiana de Municipis de Montanha.

Aguesta Trobada ei un espaci de debat sus es accions que s’amien a tèrme en nòste país, Italia, Portugal e França entara dinamizacion, visibilizacion e rèptes des zònes de montanha.

“Coma territòri de montanha, era Val d’Aran compartís rèptes damb era rèsta de zònes de montanha, coma era retencion deth talent joen, era fixacion de professionaus, o es comunicacions terrestres e digitaus” afirmaue era sindica d’Aran, en tot híger que: “deth govèrn deth Conselh Generau ençà volem mantier relacion damb toti aguesti territòris entà conéisher quines accions amien a tèrme e compartir solucions as besonhs e rèptes de futur, dera madeisha manèra que ja ac hèm damb d’auti territòris vesins coma es comarques deth Naut Pirenèu, damb qui mantenguem ua estreta relacion de collaboracion”.

Era preséncia dera sindica en aguesta jornada ei ua oportunitat entà intercambiar informacion e experiéncies e desvolopar estrategies comunes entre es territòris de montanha de d’auti païsi, en especiau, deth pais vesin.

Era associacion esMontañas se formèc en 2013 entà amassar as municipis de montanha de tot er estat, reivindicar es sòns besonhs e prebotjar es melhores legislatives e es accions de besonh entà melhorar era vida des vesins e vesies d’aguesti territòris e, d’alavetz ençà, ven organizant congrèssi e jornades en diuèrsi pòbles de montanha enes que se debat e tracte sus es rèptes des zònes ruraus atau coma sus er escambi d’experiéncies e projèctes.