• Era Associacion Espanhòla de Municipis de Montanha – esMontañas a organizat, es dies 20 e 21 de junh, es jornades “Creant un futur sostenible tàs nòstes montanhes” en Manzaneda (Orense), ues jornades enes que s’a debatut sus qüestions coma era compensacion per servicis ambientaus, era importància dera ramaderia extensiva ena prevencion d’incendis, es naui modèls de gestion forestau e era emprenedoria enes pòbles de montanha.

Era sindica d’Aran, Maria Vergés, a participat enes jornades “Creant un futur sostenible tàs nòstes montanhes” qu’a organizat era associacion esMontañas pendent es dies 20 e 21 en Manzaneda (Orense).

Pendent es jornades, era sindica d’Aran a moderat era taula redona sus es “Naui modèls de gestion forestau”, ena que i preneren part representants de PEFC España, dera Conselleria de Medio Rural dera Xunta de Galicia e deth cluster European Clusters Alliance. Atau madeish, a estat era encargada de clausurar aguest eveniment.

En aguestes jornades, que s’includissen enes actes dera capitalitat des zònes de montanha que esMontañas autrege cada an, e qu’enguan compartíssen quate municipis galhècs, qu’ei eth prumèr an qu’aguesta capitalitat se compartís entre un madeish territòri. Aguest eveniment a tractat tanben es besonhs e dificultats des ajuntaments petiti ena gestion deth dia a dia, atau coma era compensacion per servicis ambientaus, era importància dera ramaderia extensiva ena prevencion d’incendis, es naui modèls de gestion forestau e er emprenedoria enes pòbles de montanha.

Eth Conselh Generau d’Aran, atau coma quauqui ajuntaments aranesi, formen part dera associacion esMontañas, dera qu’era sindica d’Aran n’ostente era secretaria generau, ua associacion qu’a coma objectiu reivindicar es besonhs des zònes de montanha de tota Espanha e prebotjar es melhores legislatives e es accions que contribuïsquen a melhorar era vida des sòns abitants, arturar erth despoblament e generar desvolopament economic e sociau.

Vielha, 22 de junh 2024