• Damb motiu dera celebracion deth Dia Internacionau der aigua, qu’auec lòc eth passat 22 de març, era associacion de municipis de montanha esMontañas a organizat en Sobrescobio (Astúries) pendent es dies 24 e 25 de març aguestes jornades, a on era sindica d’Aran participèc ager coma moderadora ena taula redona “Concessions, caducitat, oportunitats e limits ar aprofitament der aigua enes petiti municipis”

Era sindica d’Aran, Maria Vergés, participe pendent es dies 24 e 25 de març enes jornades sus er aigua coma element generador d’oportunitats qu’era associacion esMontañas a organizat ena poblacion de Sobrescobio, en Astúries.

Era sindica, coma secretaria generau d’esMontañas, a moderat era taula redona “Concessions, caducitat, oportunitats e limits ar aprofitament der aigua enes petiti municipis”, qu’a compdat damb era participacion deth President dera Confederacion Idrografica deth Cantabric, Manuel Gutiérrez, eth Director Generau de Miei Naturau deth Principat d’Astúries, David Villar, era Secretaria Generau de Femembalses, Maite Bardají, e er alcalde de Somiedo, Belarmino Fernández.

Cau rebrembar qu’eth Conselh Generau d’Aran exercís era secretaria generau d’esMontañas der an 2020 ençà. Aguesta associacion neishec en an 2013 damb er objectiu d’amassar as municipis de montanha de tot er estat, reivindicar es sòns besonhs e prebotjar es melhores legislatives e es accions de besonh entà melhorar era vida des vesins e vesies d’aguesti territòris, frenar eth despoblament e generar desvolopament economic e sociau en aguesti endrets.