• Aguesta passada setmana era sindica d’Aran, Maria Vergés, prenec part enes jornades que jos eth titol “Rèptes e oportunitats ena gestion toristica des pòbles de montanha” organizèc era Asociación de Municipios de Montaña de España en municipi de Tejeda (Gran Canaria) es dies 12 e 13 de mai amassa damb er ajuntament d’aguest endret.

Era associacion esMontañas se formèc en 2013 entà amassar as municipis de montanha de tot er estat, reivindicar es sòns besonhs e prebotjar es melhores legislatives e es accions de besonh entà melhorar era vida des vesins e vesies d’aguesti territòris e, d’alavetz ençà, ven organizant congrèssi e jornades en diuèrsi pòbles de montanha enes que se debat e tracte sus es rèptes des zònes ruraus atau coma sus er escambi d’experiéncies e projèctes.

En aguesta ocasion, era jornada organizada en municipi de Tejeda (Gran Canaria) tractèc sus es rèptes e oportunitats deth torisme enes zònes de montanha. Era sindica d’Aran i prenec part en tot moderar era taula redona “Oportunitats ena gestion toristica des pòbles de montnaha” ena qu’intervengueren eth president dera associacion de “Pueblos más bonitos de España”, Francisco Mestre, que parlèc dera importància de méter en valor eth patrimòni culturau des pòbles; era vicepresidenta dera Deputacion de Palencia, Mª José de la Fuente, que presentèc era oferta toristica d’aguest territòri; e era directora der Ecomuseu de Somiedo (Astúries), Maria Teresa Lana, que metec en valor era gestion toristica deth patrimòni naturau.

Pera sua part, era sindica d’Aran, Maria Vergés, destaquèc era importància deth desvolopament toristic enes territòris de montanha que “s’evidencie damb es donades d’impacte economic des lòcs a on aguesta activitat economica s’a desvolopat en comparacion damb d’auti a on eth torisme non se gestione” e higie que “ei de besonh desdemonizar eth torisme e apostar pes accions e activitats sostenibles, non sonque per çò que tanh ath miei ambient, se non tanben ara igualtat d’oportunitats e ath desvolopament sociau e territoriau”.

Era associacion esMontañas a coma objectiu era representacion e accion des territòris de montanha entà aportar solucions e prepauses as problèmes de despoblacion, desarraitzament, manca d’oportunitats e isolament. Eth Conselh Generau d’Aran entrèc a formar part d’aguesta associacion en an 2021, e era sindica d’Aran n’ocupe era secretaria generau.