Ena trobada an tractat sus es ahèrs qu’actuaments se trabalhen entre andues institucions en matèria d’atencion sociau, coma ei eth besonh de barrar eth convèni de traspàs de competéncies en aguesta qüestion qu’a de perméter consolidar era cartèra de servicis sociaus deth Conselh Generau d’Aran en tot melhorar-ne eth finançament e era capacitat de decision dera maxima institucion aranesa en matèries coma per exemple es declaracions de dependéncia, entà poder atau esdevier mès agils e resolutius deuant des demanes dera ciutadania.
Damb eth barrament d’aguest traspàs eth Conselh Generau d’Aran preten consolidar eth sistèma sanitari e sociau aranés, qu’ei dessenhat com un unic sistèma que permet era gestion integrau e transversau de tot aquerò que tanh ara salut e ath benèster dera ciutadania d’Aran.
Pendent era amassada s’a convengut tanben crear ua comission tecnica de seguiment entre eth departament de Drets Sociaus e eth Conselh Generau d’Aran entà amiar a tèrme es trabalhs d’actualizacion dera cartèra de servicis en Aran

Era sindica d’Aran, Maria Vergés, a recebut aguest maitin ara conselhèra de Drets Sociaus dera Generalitat de Catalunya, Violant Cervera, damb qui a tractat diuèrsi ahèrs relacionadi damb era atencion sociau ena Val d’Aran que son primordiaus entath govèrn deth Conselh Generau d’Aran.

Pendent era trobada, era sindica d’Aran a explicat ara conselhèra Cervera coma ei organizat eth modèl sanitari e sociau aranés, “un modèl unic, pròpri e trasversau que s’a demostrat eficaç ara ora d’atier es besonhs dera nòsta ciutadania”.

En aguest sens, era sindica d’Aran a expausat que: “eth traspàs competenciau en matèria sociau sonque ei establit en diuèrsi decrèts e acòrds e non a arribat jamès a concretar-se eth corresponent convèni de traspàs” e asseguraue que: “ei de besonh arténher aguesta transferéncia entà poder desvolopar es politiques sociaus que son de besonh ena Val d’Aran, ath temps que tanben artenhem era ampliacion dera cartèra de servicis, en ua prumèra instància a trauès dera melhora der actuau programa, pr’amor qu’en aguesti moments compdam damb ua cartèra de servicis mens ampla dera qu’an es territòris vesins”.

Actuaments era maxima institucion aranesa recep, per part dera Generalitat de Catalunya, un totau de 1.906.853 € entà atencion sociau, que se despartissen en:

Residéncia St Antòni de Vielha: 1.379.437 €
Servicis d’Atencion Primària: 261.903 €
Centre Aucupacionau: 124.729 €
Atencion Precòça: 56.238 €
Transpòrt adaptat: 32.143 €
SIAH: 30.095 €
Atencion domiciliària: 19.728 €
Violéncia de genre: 2.577 €

Aguesta chifra place ara Val d’Aran coma eth territòri deth Pirenèu damb era inversion en atencion sociau mès baisha, quauquarren qu’eth govèrn d’Aran vò capvirar entà èster mès proactius e poder amiar a tèrme accions d’impacte ena melhora dera qualitat de vida des persones deth territòri.

Atau madeish, entre d’auti ahèrs, era sindica d’Aran tanben a explicat ara conselhèra de Drets Sociaus era actuau situacion dera Residéncia Sant Joan de Les, tara qu’eth Conselh Generau d’Aran cerque solucions viables e adaptades ara realitat actuau, dempús que siguesse bastida ena passada legislatura sense compdar damb cap estudi de viabilitat tecnica ne economica que, amassa damb er impacte dera COVID-19, an impossibilitat era sua dubertura.

Deuant aguesta situacion, eth govèrn deth Conselh Generau d’Aran trabalhe entà actualizar e ajustar era gestion dera Residéncia entà que, damb finançament europèu e dera Generalitat, esdevengue un servici d’atencion ara ciutadania, que pogue inclodir places de residéncia mès que tanben inclodisque servicis d’atencion ara discapacitat, entre d’auti, entà esdevier un centre integrau d’atencion as persones e que contemple es besonhs de futur dera ciutadania aranesa en totes es sues etapes vitaus.

Era sindica d’Aran a volut “arregraïr en prumèr lòc era visita dera conselhèra e era sua predisposicion entà amiar a tèrme aguestes prepauses que li auem presentat, autant per çò que hè ar encastre competenciau coma ath mès tecnic, que mos an de perméter dar un saut qualitatiu fòrça important ena atencion as persones en Aran”.

En aguesta amassada, tanben s’a instodusit ara conselhèra Cervera eth modèl d’Atencion Sociau en entorn Domiciliari (SAeD) qu’a desvolopat eth Conselh Generau ena Val d’Aran, que facilite era atencion de proximitat a persones granes, damb discapacitat, gent damb besonhs puntuaus, familhes monoparentaus o enfants en situacion de risc enes sòns domicilis, qu’a resultat tot un èxit d’ençà dera sua implementacion eth passat mes de mai e compde dejà damb 26 usatgèrs e usatgères.