• En aguesta trobada, ena que s’an tractat diuèrsi ahèrs relacionadi damb er ensenhament ena Val d’Aran, era sindica d’Aran a sollicitat ara conselhèra Simó eth besonh de coordinar entre eth departament d’Educacion e eth Conselh Generau d’Aran totes aqueres qüestions qu’an a veir damb er ensehament der aranés

Era sindica d’Aran, Maria Vergés, a recebut aguest maitin ara conselhèra d’Educacion dera Generalitat de Catalunya, Anna Simó, damb qui a tractat diuèrsi ahèrs relacionadi damb er ensenhament ena Val d’Aran.

“En aguesta trobada, è sollicitat ara conselhèra Simó eth besonh de coordinar entre eth departament d’Educacion e eth Conselh Generau d’Aran tot aquerò que hè referéncia as qüestions relacionades damb er ensenhament en aranés” asseguraue era sindica d’Aran, en tot rebrembar tanben que “a despièch qu’eth govèrn d’Aran non a competéncies en aguest airau, ei era nòsta volontat desvolopar accions qu’ajuden ara Escòla Aranesa, qu’entenem coma un des pilars fonamentaus dera nòsta societat, a desvolopar-se coma element d’integracion e de desvolopament sociau”.

En aguest sens, cau rebrembar qu’en marc des sues possibilitats, eth Conselh Generau d’Aran impulsèc er an passat era creacion dera Taula d’Ensenhament d’Aran entà establir un espaci de coordinacion e participacion entà, per un costat, establir un debat constructiu sus er ensenhament en Aran e, per un aute, impulsar accions qu’ajuden ath desvolopament e consolidacion dera Escòla Aranesa coma element vertebrador dera nòsta societat e coma motor deth procès de normalizacion lingüistica.