• En aguesta prumèra amassada dera sindica d’Aran e eth conselhèr d’Espòrts damb era presidenta dera FCEH s’a manifestat era volentat de mantier ua estreta relacion de collaboracion entre andues institucions e s’an tractat tanben ahèrs relacionadi damb era candidatura olimpica Pirenèus-Barcelona 2030

Aguest maitin, era sindica d’Aran, Maria Vergés, e eth conselhèr d’Espòrts, Amador Marqués, an recebut ara presidenta dera Federacion Catalana d’Espòrts d’Iuèrn, Mònica Bosch, ua amassada ena qu’an participat tanben eth vicepresident dera FCEH, David Samper, era delegada territoriau dera FCEH ena Val d’Aran, Anna Geli, e era directora deth Centre d’Espòrts d’Iuèrn (CETEI) dera Val d’Aran, Aida Castellà.

“En aguesta prumèra amassada damb era presidenta dera FCEH auem volut manifestar era nòsta disposicion a collaborar damb era Federacion en tot çò que pogam, pr’amor qu’era Val d’Aran a ua relacion molt estreta damb es espòrts d’iuèrn e ei era volentat deth govèrn deth Conselh Generau d’Aran trabalhar entà facilitar es carrères des nòsti esportistes en aguest airau”, asseguraue era sindica d’Aran.

Entre d’auti ahèrs, pendent aguesta trobada tanben s’an tractats ahèrs relacionadi damb era candidatura olimpica Pirenèus-Barcelona 2030. En aguest sens, eth conselhèr Marqués destacaue que “aguesti Jòcs Olimpics e Paralimpics d’Iuèrn aurien un important impacte e repercussion entath desvolopament economic e sociau deth nòste territòri” e higie que “era importància d’aguesti Jòcs tanben se trape en qu’an coma base fonamentau eth respècte ath mèdi ambient, er equilibri territoriau e era luta contra eth despoblament”.