• Pendent era amassada de trabalh mantenguda aguest maitin ena sedença deth Conselh Generau d’Aran, s’a valorat era evolucion dera pandèmia en nòste territòri e, autant era sindica d’Aran coma era secretaria de Salut Publica, s’an emplaçat a seguir trabalhant de manèra conjunta en qüestions de salut publica, ath temps que se garantís era autonomia dera Val d’Aran en aguest airau

Era sindica d’Aran, Maria Vergés, a recebut aguest meddia ara secretaria de Salut Publica dera Generalitat de Catalunya, Carme Cabezas, damb qui a mantengut ua amassada de trabalh ena qu’an estat presents era directora deth SABS, Maria Àngels Borràs, eth director-gerent d’Aran Salut, Jordi Vilana, eth gerent dera Region Sanitària deth Naut Pirenèu e Aran, Felip Benavent, e d’auti representants d’Aran Salut, e CatSalut.

Pendent aguesta amassada, s’a metut en valor era importància dera relacion entre eth Conselh Generau d’Aran e eth Departament de Salut dera Generalitat, en aguest sens, cau destacar qu’eth govèrn d’Aran forme part deth Conselh de Salut de Catalunya presidit peth pròpri conseller de Salut, Josep Mª Argimon. En aguesta trobada tanben s’a valorat era evolucion dera pandèmia ena Val d’Aran, atau coma es accions de collaboracion que s’amien a tèrme damb eth servici de Salut Publica autant de Lleida coma de Barcelona.

“Deth Conselh Generau d’Aran ençà èm fòrça arregraïdi pera visita dera secretaria generau e pera sua predisposicion a trabalhar de manèra conjunta damb nosati en qüestions de desvolopament der airau de salut publica en nòste territòri” afirmaue era sindica d’Aran, en tot híger que: “a despièch de mantier era nòsta autonomia en aguest airau, ei fòrça important entà nòsati seguir vinculadi ath Departament de Salut e contunhar collaborant entà arténher ua melhor atencion as persones en nòste territòri”.