• Pendent aguesta amassada, era sindica a trasladat ara conselhèra eth besonh de qu’eth nòste territòri compde damb equipaments culturaus que poguen acuélher activitat culturau de tot tipe, e li a hèt arribar nauaments era preocupacion deth govèrn aranés per estat dera nòsta lengua pròpria e eth besonh d’establir vies de collaboracion entre eth Conselh Generau e era Generalitat dera leiautat institucionau ençà entà sollucionar aguest ahèr

Aguest maitin, era sindica d’Aran, Maria Vergés, a recebut ena sedença deth Conselh Generau d’Aran ara conselhèra de Cultura dera Generalitat de Catalunya, Àngels Ponsa i Roca. En aguesta amassada, ena qu’an estat presents tanben era conselhèra de Coneishement d’Aran, Angelina Cases, e eth cap des servicis territoriaus en Lleida, Miquel Àngel Cullerés, s’an tractat diuèrsi ahèrs relacionadi damb es problematiques e besonhs que presènte Aran enes airaus de lengua e cultura.

“Auem expausat ara conselhèra en quin estat se trape eth desvolopament dera Lei d’Aran en matèria de cultura e auem demanat era implicacion deth sòn Departament entà poder desvolopar es nòstes competéncies damb es garanties e recorsi de besonh en un airau tant important entath nòste territòri coma ei aguest”, explicaue era sindica d’Aran, en tot híger que: “era Val d’Aran patís des de hè fòrça ans un deficit important en çò que hè as infraestructures culturaus en comparacion damb d’auti territòris vesins, per aguest motiu, eth govèrn deth Conselh Generau d’Aran considère primordiau poder desvolopar politiques culturaus que, per un costat, dinamizen era cultura en Aran e balhen supòrt as entitats sociaus que se dediquen ad aguest prètzhèt e, per aute, qu’aguestes accions en matèria de cultura servisquen tanben coma motor e supòrt ara perviuença e normalizacion der aranés”.

En aguest sens, s’a insistit en besonh de desvolopar de forma conjunta un Plan d’Equipaments que garantisque era creacion d’un equipament culturau transversau ena Val d’Aran. Entre d’auti ahèrs, tanben s’a demanat era collaboracion dera Direccion Generau de Patrimòni de Catalunya en encastre des Béns Culturaus d’Interès Locau (BCIL) dera Val d’Aran.