• Aguest maitin s’a amiat a tèrme er acte de celebracion de Santa Barbara, patrona des Pompièrs d’Aran organizat peth Conselh Generau d’Aran entà méter en valor eth servici ara comunautat que preste eth còs de Pompièrs d’Aran en nòste territòri

• Pendent er acte institucionau, s’a amiat a tèrme era entrega des medalhes de “Bombers voluntaris de la Generalitat de Catalunya”, que distingissen era trajectòria des pompièrs a qui se concedissen en foncion des ans d’antiguitat e des servicis excepcionaus realizadi

Aué, 4 de deseme de 2023, s’a celebrat era tradicionau hèsta de Santa Barbara, patrona des Pompièrs d’Aran, ua jornada commemorativa entà méter en valor eth servici ara comunautat que prèste eth còs de Pompièrs d’Aran.

Pendent er acte institucionau, s’a amiat a tèrme era entrega des medalhes de “Bombers voluntaris de la Generalitat de Catalunya”, que distingissen era trajectòria des pompièrs a qui se concedissen en foncion des ans d’antiguitat e des servicis excepcionaus realizadi.

Er acte a estat presidit pera sindica d’Aran, Maria Vergés, eth Major des Pompièrs, Manel Bosch, e peth director generau de Prevencion, Extincion d’Incendis e Sauvament dera Generalitat, Joan Delort.

Pendent er acte, era sindica d’Aran a volut destacar que: “der 1 de gèr de 2023 ençà, er airau d’emergéncies deth govèrn d’Aran comencèc a foncionar de forma autonòma, en tot gestionar era emergéncia de forma transversau ena Val d’Aran. Eth Conselh Generau d’Aran assumic era competéncia dera gestion des emergéncies e dera proteccion civila e prevencion, en tot seguir er Acòrd Institucionau de 2019 entre era maxima institucion aranesa e era Generalitat de Catalunya. Acòrd Institucionau, que contemple, entre d’autes, ahèrs relatives ara participacion deth Conselh Generau d’Aran en grops de trabalh tara redaccion de documents tipus; era renovacion, manteniment e aqueriment de veicles e disponibilitat d’elicoptèrs; era formacion, es tecnologies dera informacion e era comunicacion (TIC) e qüestions relatives ath finançament (despenes de foncionament, TIC, Parc de Vielha, eca…) a d’acabar de desplegar-se de forma complèrta. Era gestion dirècta de Pompièrs-Emergéncies per part del Conselh Generau d’Aran mos permet aplicar ua tipologia de modèl unic, integral e transversal, adaptat as besonhs e problematiques reals deth nòste territòri e ei un gran avanç en eth desvolopament der autogovèrn aranés. Ei imprescindible dotar ara Val d’Aran des insturments de besonh tà un desplegament complèt der acòrd de traspàs”.

Era Sindica a arregraït eth trabalh e era implicacion des pompièrs e pompières d’Aran, des diuèrsi caps d’equip, atau coma dera prefectura, qu’amien a tèrme eth sòn trabalh entà anar mès enlà de çò que serie estrictament es suses foncions.

Vielha, 4 de deseme de 2023