• Era sindica d’Aran s’a tornat a dirigir ara conselhèra de Drets Sociaus dera Generalitat de Catalunya entà demanar ua amassada damb era ena que poder tractar eth besonh qu’a eth Conselh Generau d’Aran d’arténher un convèni de traspàs de competéncies en matèria sociau entà poder desvolopar ues politiques sociaus que melhoren era atencion as persones en territòri

Era sindica d’Aran, Maria Vergés, s’a adreçat nauament ara consellera de Drets Sociaus dera Generalitat de Catalunya, Violant Cervera, en tot sollicitar ua trobada damb era ena que poder tractar eth besonh qu’a eth Conselh Generau d’Aran d’arténher un convèni de traspàs de competéncies en matèria sociau.

“A despièch qu’eth traspàs competenciau ei establit en diuèrsi decrets e acòrds, non a arribat jamès a concretar-se eth corresponent convèni de traspàs, qu’ei eth document a on s’an de desvolopar es contenguts d’aguesti decrets, atau coma consensuar-ne es recorsi destinadi e era sua interpretacion, damb era finalitat de facilitar-ne era aplicacion e coordinar es actuacions des parts, en benefici dera atencion ara poblacion aranesa”, explicaue era sindica d’Aran, Maria Vergés.

En aguest sens, era sindica d’Aran rebrembe que: “era Val d’Aran compde damb un modèl sociau e sanitari unic, un modèl pròpri e transversau que s’a demostrat eficaç ara ora d’atier es besonhs dera nòsta ciutadania”. Totun, afirme que “ei de besonh arténher aguest convèni de traspàs de competéncies entà poder desvolopar ues politiques sociaus ara nautada de çò que meriten es aranesi e araneses, pr’amor qu’en aguesti moments compdam damb ua cartèra de servicis mens ampla dera qu’an es territòris vesins”.

Atau donques, e dempús de non auer recebut responsa eth passat mes de seteme quan dejà se demanèc ua amassada entà tractar aguesti ahèrs, era sindica d’Aran a emplaçat ara consellera Cervera a agendar ua trobada ena que poder parlar sus era situacion actuau des servicis que gestione eth Conselh Generau d’Aran en matèria d’atencion sociau e eth besonh de redaccion e aprovacion d’aguest convèni de traspàs de competéncies, qu’aurà de facilitar ara maxima institucion aranesa a exercir es competéncies que mandate er article 59 dera Lei de Regim Especiau d’Aran entà melhorar era atencion as persones.