• Pendent aguesta trobada, era sindica d’Aran, Maria Vergés, a plantejat ar alcalde de Barcelona, Jaume Collboni, era predisposicion deth govèrn d’Aran de crear sinergies en airaus coma eth torisme que servisquen tanben tà daurir un dialòg entre territòris de montanha e granes ciutats

• Tanben s’an tractat qüestions relacionades damb era aliança estrategica qu’eth Conselh Generau d’Aran manten damb er “Hospital del Mar” pr’amor qu’er Ajuntament de Barcelona forme part, amassa damb era Generalitat de Catalunya, deth consòrci sanitari Parc Salut MAR, deth que ne depen aguest centre sanitari.

• Aguesta amassada supause era prumèra d’ua ronda de contactes qu’era sindica d’Aran mantierà damb diferents autoritats e representants publics

Era sindica d’Aran, Maria Vergés, s’a amassat aguest meddia damb er alcalde de Barcelona, Jaume Collboni, e era tinent d’alcalde, Maria Eugènia Gay, damb qui a tractat diuèrsi ahèrs comuns entre Barcelona e Aran.

“A despièch des diferències e era distància que mos separen, era Val d’Aran e Barcelona compartissen eth sòn estatus de territòris singulars laguens de Catalunya, damb reconeishement ena nòsta Lei de Regim Especiau e era Carta Municipau de Barcelona”, asseguraue era sindica d’Aran, en tot híger que: “atau madeish, eth nòste territòri manten ua importanta aliança damb eth Parc de Salut Mar, qu’ei un consòrci sanitari public gestionat per Ajuntament de Barcelona amassa damb era Generalitat, e damb qui mantenguem ua estreta collaboracion que mos permet melhorar e ampliar era nòsta cartèra de servicis en tot facilitar era atencion as persones”.

Era sindica d’Aran a manifestat en aguesta amassada damb er alcalde Collboni “era volontat deth govèrn d’Aran d’èster proactius ara ora de cercar collaboracions e aliances en d’auti airaus coma eth torisme o en qüestions que supausen ua problematica comuna coma ei eth tèma der abitatge, un ahèr tath quau eth Conselh Generau d’Aran cerque solucions urgentes pr’amor dera actuau situacion de manca de viuenda assequibla”.

Vergés a volut arregraïr “era atencion e predisposicion mostrada per alcalde Collboni entà daurir dialòg e dinamiques entre un territòri de montanha coma eth nòste e ua grana ciutat coma ei Barcelona”.

Aguesta ei era prumèra d’ua ronda de contactes institucionaus qu’era sindica d’Aran mantierà damb diferents autoritats deth país.