• Damb aguesta amassada s’inicien es trabalhs tath desvolopament der àmbit dera proteccion civila en Aran que, dempús d’auer assumit eth passat 1 de gèr era competéncia integra dera gestion d’emergéncies en territòri a trauès deth còs des Pompièrs d’Aran, servirà entà gestionar tanben diuèrsi ahèrs en aguest àmbit, atau e coma mèrque era Lei d’Aran

Era sindica d’Aran, Maria Vergés, acompanhada deth Major de Pompièrs, Manel Bosch, eth cap d’operacions de Pompièrs, Eric Vilò, e era responsabla dera seccion de coordinacion e proteccion civila de Pompièrs, Fina Calvo, an recebut aué ena sedença deth Conselh Generau d’Aran ara directora generau de Proteccion Civila dera Generalitat de Catalunya, Marta Cassany, e ara subdirectora generau de coordinacion e gestion d’emergéncies, Imma Solé, e ath subdirector generau de programes, Sergio Delgado.

Pendent aguesta trobada, an tractat sus coma definir conjuntament es naui ròtles a assumir en matèria de proteccion civila ena Val d’Aran, competéncies qu’era maxima institucion aranesa a de poder desvolopar, atau coma mandate era Lei de regim especiau d’Aran en sòn article 72.

En aguest sens, s’a acordat crear ua comission de trabalh a nivèu tecnic entà ja començar a definir es besonhs, planificacion e recorsi de besonh entà poder desvolopar aqueri ahèrs en matèria de proteccion civila qu’eth Conselh Generau d’Aran pòt assomir.

Cau rebrembar que, der 1 de gèr de 2023 ençà, era maxima institucion aranesa a assomit era competéncia integra des emergéncies en territòri, en tot gestionar de manèra independenta e transversau es emergéncies, atau e coma mercaue er Acòrd Institucionau de gestion integrau d’emergéncies en Aran, aprovat en 2019 pera Comission Bilaterau entre eth govèrn d’Aran e era Generalitat.