Era sindica d’Aran s’amasse damb era presidenta deth Parlament de Catalunya

Pendent era amassada mantenguda aguesta tarde, era sindica d’Aran, Maria Vergés, a transmetut ara presidenta deth Parlament, Laura Borràs, entre d’auti ahèrs primordiaus entath nòste territòri, eth besonh de qu’eth Conselh Generau d’Aran sigue partícep des iniciatives legislatives que se tramiten en Parlament e qu’afècten ara Val d’Aran de forma dirècta, atau coma eth d’establir ua collaboracion en aguesti ahèrs entre andues institucions
Era sindica a reprenut aué tanben era ronda de contacte damb es grops parlamentaris e s’a amasat damb eth deputat d’En Comú Podem, David Cid, e era presidenta deth grop dera CUP-NCG, Dolors Sabater, as qui a expausat es besonhs e rèptes de futur deth nòste territòri

Era sindica d’Aran, Maria Vergés, s’a amassat aguesta tarde damb era presidenta deth Parlament de Catalunya, Laura Borràs, entà tractar ahèrs d’importància entà Aran.

“È prepausat ara presidenta Borràs qu’eth Parlament e eth Conselh Generau d’Aran collabòren en totes aqueres questions juridiques qu’afecten ara Val d’Aran e, dera madeisha manèra, qu’eth Conselh Generau sigue partícep des iniciatives legislatives qu’agen impacte en nòste territòri, atau e coma dispòse er article 94.4 der Estatut d’Autonomia de Catalunya”, afirmaue era sindica d’Aran.

Entre d’auti ahèrs, era sindica tanben a destacat “qu’er an passat, per prumèr viatge dera aprovacion dera Lei de Regim Especiau d’Aran ençà, eth sindic d’Aran amièc a tèrme era compareishença annau qu’establís er article 80 d’aguesta Lei, e que servís entà expausar era situacion e es problematiques que patís eth nòste territòri, atau coma es nòsti rèptes de futur”, e higie que: “pr’amor dera importància qu’a entà Aran e entath Conselh Generau d’Aran aguest hèt, è demanat ara presidenta deth Parlament poder agendar aguesta compareishença en finalizar er ostiu e qu’era madeisha servisque tanben entà qu’es diuèrsi grops parlamentaris poguen presentar ressolucions sus era Val d’Aran entà èster debatudes ena cramba catalana”.

Era sindica d’Aran a arregraït era volentat dera presidenta deth Parlament entà establir ua naua etapa ena relacion d’andues institucions en aguesta naua legislatura.

Ath delà, era sindica a contunhat aué damb era ronda de contactes damb es grops parlamentaris e s’a amassat damb eth deputat d’En Comú Podem, David Cid, e damb era presidenta deth grup parlamentari dera CUP-NCG, Dolors Sabater, as que, atau e coma he’c eth passat mes de mai damb eth president deth grup parlamentari deth PSC, Salvador Illa, les a expausat es besonhs e es rèptes de futur dera Val d’Aran e as qui a arregraït tanben era atencion e comprension balhada.