• Pendent era amassada mantenguda aguest meddia, era sindica d’Aran e era presidenta deth Parlament an tractat sus ahèrs coma era compareishença annau dera sindica d’Aran qu’enguan, atau e coma sollicitèc era pròpia sindica en mes de seteme, s’amiarà a tèrme en sen deth Plen deth Parlament en mes de deseme

• Tanben s’a parlat sus eth besonh de mantier ua relacion bilaterau entre eth Conselh Generau d’Aran e eth Parlament de Catalunya que permete desvolopar er autogovèrn aranés, en tot implementar era Lei d’Aran e hèr particep ath govèrn d’Aran enes iniciatives legislatives que se tramiten e que poguen auer impacte en nòste territòri en tot impulsar era Oficina d’Aran en Parlament

• Aguesta amassada forme part dera ronda de contactes institucionaus qu’era sindica d’Aran manten damb diferents autoritats e representants publics

Era sindica d’Aran, Maria Vergés, s’a amassat aguest meddia damb era presidenta deth Parlament de Catalunya, Anna Erra, entà tractar diuèrsi ahèrs d’importància entà Aran.

“Pendent era trobada, è trasladat ara presidenta Erra eth besonh de mantier aguesta relacion bilaterau entre eth Parlament e eth Conselh Generau d’Aran que mos permete desvolopar eth nòste autogovèrn, non sonque a trauès dera Lei de Regim Especiau d’Aran, senon tanben en tot hèr ath govèrn d’Aran particep des iniciatives legislatives que se tramiten e que poguen auer impacte en nòste territòri, atau coma dispòse er article 94.4 der Estatut d’Autonomia de Catalunya”, asseguraue era sindica d’Aran.

En aguest sens, a metut en valor tanben “eth trabalh qu’amie a tèrme era Oficina d’Aran en Parlament, que s’a demostrat en aguesti darrèri ans totauments indispensable e foncionau, permetent ath govèrn d’Aran mantier un contacte dirècte damb eth Parlament de Catalunya e, atau e coma mandate er article 80.1 dera Lei d’Aran, tanben entà amiar a tèrme foncions d’assessorament e supòrt en qüestions que son fòrça de besonh”.

Atau madeish, an tractat sus era compareishença annau dera sindica d’Aran qu’enguan, per prumèr còp, s’amiarà a tèrme en mes de deseme en Plen deth Parlament per peticion dera pròpria sindica d’Aran. Ua intervencion que, atau coma mandate era Lei de Regim Especiau d’Aran, permet debàter sus era situacion actuau deth nòste territòri e qu’en amiar-se en sen deth Plen, poirà esdevier un vertadèr debat en qu’es pròpris grups parlamentaris poguen tanben presentar resolucions ath respècte.

Aguesta ei era dusau amassada dera ronda de contactes institucionaus qu’era sindica d’Aran encetèc aguest madeish mes en tot amassar-se damb er alcalde de Barcelona, Jaume Collboni, e que mantierà damb diferents autoritats deth país.