• En aguesta trobada era sindica d’Aran a trasladat ara secretària Generau era importància qu’a entà Aran qu’eth Ministèri seguisque auançant damb es trabalhs previsti entara melhora dera carretèra N-230.

Era sindica d’Aran, Maria Vergés, s’a amassat aguest maitin, ena sedença deth Ministèri de Transpòrts e Mobilitat Sostenibla en Madrid, damb era secretària generau de Transpòrt Terrèstre der Estat, Marta Serrano, entà tractar er actuau estat deth projècte de condicionament dera carretèra nacionau 230 en qué trabalhe eth Ministèri.

Pendent era amassada s’a tractat sus er estat des trabalhs iniciadi peth Ministèri entà melhorar  era N-230 que serviràn entà descongestionar aguesta artèria de comunicacion rotèra entre Aran, Estat espanhòu e França.

Actuauments se trapen ja en procès de redaccion es projèctes des trams Almenar-Benabarre e Benabarre-Sopeira. Per çò que hè ath tram de Sopeira-Boca Sud deth tunèl de Vielha se trabalhe ena licitacion deth projècte qu’a ua complexitat fòrça nauta pr’amor de qüestions ambientaus e geografiques. Atau madeish, era redaccion deth projècte entre era boca nord deth tunèl e Vielha ei dejà en marcha.

Era sindica d’Aran a manifestat que: “damb aguesta trobada mantenguem eth contacte dirècte damb eth  Ministèri ath que, a trauès dera secretària generau de Transpòrts, li è trasladat era importància qu’a entà Aran e es territòris vesins qu’aguesti projèctes poguen èster realitat enes pròplèu mesi, entà que poscam veir er inici des òbres tant lèu coma es tràmits administratius e ambientaus ac permeten”. Atau madeish higie qu’: ” era secretària generau m’a trasladat nauments eth compromís der Estat damb era melhora d’aguesta carretèra e qu’es trabalhs contunhen laguens de çò previst, dada era dimension e complexitat des projèctes”.

Eth compromís der Estat damb aguesta melhora a suposat tara Val d’Aran un important auanç, pr’amor dera demana reiterativa ath long dera istòria d’aguest condicionament, sustot entà melhorar-ne era seguretat.

Vielha, 26 de junh 2024