• Pendent eth dia d’ager auec lòc en Sort, ena sedença deth Conselh Comarcau deth Pallars Sobirà, era amassada des presidéncies des conselhs comarcaus deth Pirenèu e dera sindica d’Aran entà tractar diuèrsi ahèrs d’interés comun ad aguesti territoris, entre es que en destaquèren eth besonh de compdar damb ua comunicacion mès dirècta e floïda damb eth govèrn dera Generalitat, sustot deuant dera manca d’interlocucion constatada pendent era crisi dera COVID-19

Ager auec lòc en Sort ua amassada entre era sindica d’Aran, Maria Vergés, e es presidéncies des conselhs comarcaus deth Pirenèu (Alta Ribagorça, Pallars Jussà, Pallars Sobirà, Urgell e Cerdanya), ena quau se constatèc qu’era crisi provocada pera COVID-19 a metut de manifèst manca de comunicacion e eth besonh d’ua interlocucion dirècta entre era Generalitat de Catalunya e eth Naut Pirenèu e Aran, atau coma era reclamacion conjunta d’ua vision mès de territòri per part deth govèrn catalan enes politiques e decisions.

Pendent era trobada se tractèc tanben dera repercussion des hons europèus en Naut Pirenèu e era Val d’Aran, e se reafirmèc era intencion d’incidir en projèctes conjunts que supausen era reactivacion e diversificacion socioeconomica d’aguesti territòris, era transicion energetica e bioeconomica, e era connectivitat e digitalizacion, entre d’auti ahèrs.

“A estat ua amassada fòrça profitosa, sustot damb er objectiu de trabalhar conjuntament en aqueri ahèrs que son d’interès tàs territòris deth Pirenèu” a manifestat era sindica d’Aran e higie que “tot e qu’era singularitat aranesa e eth nòste autogovèrn hèn qu’era relacion damb era Generalitat age d’èster bilaterau, tath govèrn aranés ei fòrça important establir singèrgies e amassar esfòrci damb es territòris vesins en tematiques tant importantes coma era diversificacion dera economia o era digitalizacion, enes que compartim rèptes e objectius”.

Atau madeish, pendent era amassada, que s’acordèc s’amie a tèrme de forma periodica, era sindica d’Aran recebec eth supòrt des presidents e presidentes des Conselhs Comarcaus deuant dera situacion provocada pera COVID-19 en Aran.