• Pendent era trobada an tractat sus es rèptes qu’andús territòris compartíssen en matèria de cooperacion transfronterèra, mobilitat, fixacion de professionaus en territòri o igualtat d’oportunitats entàs persones que demoren en Pirenèu

Era sindica d’Aran, Maria Vergés, s’a amassat aguest maitin damb eth cap de Govèrn deth Principat d’Andorra, Xavier Espot, damb qui an tractat sus es rèptes qu’Aran e Andorra compartissen coma territòris pirenencs. Aguesta ei era prumèra trobada des fegures dera sindicatura d’Aran e eth cap de Govèrn d’Andorra en mès de dètz ans.

“Tot e qu’Andorra ei un territòri competidor a nivèu toristic, i a fòrça rèptes de futur que compartim en matèria de cooperacion transfronterèra, fixacion des professionaus, manteniment des servicis publics, melhora des infraestrucutures e dera mobilitat, o era igualtat d’oportunitats entàs persones deth Pirenèu”, afirmaue era sindica d’Aran, en tot híger que: “un des maxims objectius deth Conselh Generau d’Aran ei afiançar e melhorar eth nòste autogovèrn, mès tanben volem establir sinèrgies e amassar esfòrci damb es territòris vesins e cooperar e collaborar damb eri entà arténher ues melhores comunes que poguen supausar ua melhora ena qualitat de vida des persones”.

Era sindica d’Aran participarà aguesta tarde ena Taula Redona “Quin futur volem entath Pirenèu?” prèvia as Jornades per a l’Excel·lència que se desvoloparàn era pròplèu setmana en Esterri d’Àneu e a on se parlarà sus eth desvolopament conjunt e sostenible deth Pirenèu, era importància dera cooperacion transfronterèra e des estratègies de cambi climatic, atractivitat e connectivitat.