• Maria Vergés, s’a amassat aué en Barcelona damb Francesc Xavier Vila entà tractar sus es besonhs e inquietuds deth govèrn aranés tà impulsar era nòsta lengua pròpria en matèria de promocion e normalizacion e establir er encastre de collaboracion damb era Generalitat.

• Entre ahèrs tractats s’a acordat establir prioritats de coordinacion entre andues institucions tara promocion e impuls dera lengua.

Era sindica d’Aran, Maria Vergés, s’a amassat aguest maitin en Barcelona damb eth conselhèr de Politica Lingüistica dera Generalitat de Catalunya, Francesc Xavier Vila, entà tractar diuèrsi ahèrs en matèria der usatge e promocion der aranés. Era sindica d’Aran a trasladat ath conselhèr es besonhs immediats entà garantir era supervivéncia dera lengua, que passe per consolidar eth traspàs en matèria de politica lingüistica que se trabalhèc pendent era passada legislatura dera Generalitat, e tanben definir eth tet competenciau deth Conselh Generau d’Aran en dessenh e implementacion des politiques lingüistiques pròpries.

Vielha, 11 de noveme 2024