• Pendent era amassada s’a tractat ahèrs relacionadi damb era melhora deth finançament dera sanitat aranesa e damb es projèctes estrategics qu’eth Conselh Generau d’Aran trabalhe en matèria de sanitat, coma era futura ampliacion der Espitau Val d’Aran

Aguest maitin s’a amiat a tèrme ua amassada entre era sindica d’Aran, Maria Vergés e eth conselhèr de salut dera Generalitat de Catalunya, Josep Mª Argimon. Ena trobada, que s’a amiat a tèrme de forma telematica, a estat eth prumèr contacte deth govèrn d’Aran damb eth conselhèr Argimon, i an prenut part tanben es responsables dera Region Sanitària der Alt Pirineu i Aran per un costat, e era gerenéncia d’Aran Salut e direccion deth Servici Aranés de Benèster e Salut deth Conselh Generau d’Aran.

Pendent era amassada s’a tractat deth besonh de revisar era situacion economica actuau deth sistèma de salut aranés pr’amor de solucionar eth problema de infrafinançament existent. Atau madeish, s’an emplaçat a signar era renovacion deth convèni de traspàs dera competéncia de sanitat ath Conselh Generau pendent eth prumèr trimesadèr deth pròplèu an.

Sus aguest darrèr ahèr, era Sindica d’Aran a manifestat que “era volontat deth Conselh Generau d’Aran ei consolidar eth nòste modèl sociau e sanitari, qu’ei un modèu pròpri e transversau que s’a demostrat eficaç ara ora d’atier es besonhs dera ciutadania de forma propèra”.

En un aute orde d’ahèrs, ena amassada an abordat tanben de diuèrsi projèctes dera mielhora estructurau des servicis de salut deth nòste territòri, enes que se pòrte trabalhant temps ençà, entre es que se compren era futura ampliacion der Espitau Val d’Aran, pr’amor qu’ei ua bastissa qu’a complit 35 ans e a de besonh, deuant der increment de servicis que s’aufrís, renauir es sòns espacis.

Vielha, 5 de noveme deth 2021