• Pendent era amassada era sindica d’Aran a trasladat ath conselhèr eth besonh de dar compliment ar actuau acòrd de finançament e que n’aguest 2021 non s’a podut complir per çò que hè ara aportacion addicionau de 578.000€ qu’era Generalitat a d’amiar a tèrme enquia 2023

• Un aute des punts tractadi a estat eth besonh de revertir eth deute istoric dera Generalitat damb eth Conselh d’ençà der an 2012, quan es retalhades ath pressupòst dera maxima institucion aranesa provoquèren era eliminacion des politiques pròpries deth Conselh Generau d’Aran e que non s’an recuperat

Era sindica d’Aran, Maria Vergés, s’a amassat aguest maitin en Barcelona damb eth conselhèr d’Economia e Hisenda dera Generalitat, Jaume Giró, damb qui an tractat diuèrsi ahèrs relacionadi damb eth finançament deth Conselh Generau d’Aran e d’auti ahèrs economics qu’afècten ara maxima institucion aranesa.

“Pendent era amassada è trasladat ath conselhèr Giró eth besonh de dar compliment ar acòrd de finançament entre eth Conselh Generau d’Aran e era Generalitat de Catalunya, atau coma dejà expausèrem ena darrèra amassada dera Comission Bilaterau, e que sigue efectiu entà 2022 deuant der incompliment  enguan”, asseguraue era sindica d’Aran, en tot híger: “tanben li è expausat ath conselhèr d’Economia qu’ei de besonh recuperar eth finançament entà desvolopar es politiques pròpries deth Conselh Generau, que son era garantia entà consolidar era maxima institucion aranesa e, per tant, era gestion dera proximitat ençà d’aqueres qüestions qu’afècten ara qualitat de vida dera ciutadania aranesa”.

En aguest sens cau rebrembar qu’eth govèrn catalan en an 2012  redusic de forma drastica es recorsi financèrs ath Conselh Generau, en tot retalhar en un 20% eth finançament deth govèrn aranés, çò qu’a afectat de forma dirècta as politiques pròpries deth territòri.

En aguest sens, era sindica e eth conselhèr an insistit ena importància de crear ua comunicacion floïda e bilaterau entre eth Departament d’Economia e Hisenda damb eth Conselh Generau e era sindica a volut “arregraïr ath conselhèr Giró era bona predisposicion e volentat de trabalhar damb eth Conselh Generau d’Aran”.

Entre d’auti ahèrs, s’a parlat tanben dera importància qu’a entara Val d’Aran qu’era Generalitat de Catalunya amie a tèrme inversions importants en airaus coma era mobilitat. “Deth govèrn d’Aran ençà auem era voluntat d’amiar a tèrme ua apòsta que mos permete descollapsar era C-28 pendent es 30 o 40 dies ar an qu’ei mès transitada, quauquarren que serie factible damb un tresau carril reversible que sigue ambientaument sostenible, atau coma dejà se contemplaue en Estudi de Mobilitat d’aguesta via realizat pera Generalitat”, explicaue era sindica d’Aran.

Ath delà, tanben s’an tractat ahèrs relacionadi damb era gestion e projèctes relacionadi damb es hons europèus Next Generation e era participacion deth Conselh Generau enes madeishi.