• Pendent era trobada mantenguda en Barcelona aué, era sindica a sollicitat ath conselhèr eth besonh de desplegar es compromisi que mandate er Acòrd Institucionau de 2019 entre eth Conselh Generau d’Aran e era Generalitat de Catalunya en qüestions estrategiques entara gestion des emergéncies en Aran

• Un aute des tèmes tractadi a estat eth besonh de desvolopar e coordinar era competéncia de Proteccion Civila e de prevencion. En aguest sens, s’a acordat crear ua Comission de Trabalh entà coordinar aguest traspàs

Era sindica d’Aran, Maria Vergés, s’a amassat aué en Barcelona damb eth conselhèr d’Interior dera Generalitat, Joan Ignasi Elena. Ua amassada ena qu’an estat presents tanben eth Major des Pompièrs d’Aran, Manel Bosch, eth director generau de Prevencion, Extincion d’Incendis e Salvaments, Joan Delort, era directora generau de Proteccion Civila, Marta Cassany, e era Secretària d’Interior, Tamara García.

Cau rebrembar que, en gèr de 2023, eth govèrn d’Aran assumic era gestion integrau des emergéncies en territòri, atau coma establie er Acòrd Institucionau de 2019 entre era maxima institucion aranesa e era Generalitat de Catalunya.

“Auem convengut damb eth conselhèr era activacion dera Comission de Seguiment der Acòrd Institucionau entà garantir era participacion e informacion deth Conselh Generau d’Aran en qüestions estrategiques e operatives” asseguraue era sindica d’Aran, en tot híger que: “eth compliment d’aguest Acòrd, pr’amor deth sòn abast e dera importància deth sòn impacte ena societat aranesa, ei un ahèr primordiau entath govèrn deth Conselh Generau d’Aran”.

Atau madeish, tanben s’a tractat eth besonh imperiós de desvolopar e coordinar era competéncia de Proteccion Civila e prevencion, tara que s’activarà un grop de trabalh qu’en coordinarà eth traspàs.

“Era gestion des emergéncies per part deth Conselh Generau d’Aran mos permet aplicar un modèl unic, integrau e transversau, adaptat as besonhs e problematiques reaus deth nòste territòri e ei un gran auanç entath desvolopament de autogovèrn aranés” expressaue era sindica d’Aran.