• Pendent aguesta trobada, an tractat ahèrs en comun qu’Aran e Huesca compartissen coma er estat dera N-230 o era candidatura olimpica des JJOO d’iuèrn 2030, entre d’auti

Era sindica d’Aran, Maria Vergés, s’a amassat aguest maitin damb eth president dera Deputacion Provinciau de Huesca, Miguel Gracia, damb qui a abordat ahèrs comuns entre andús territòris.

“Era Val d’Aran a ua relacion istorica damb Aragon e mès concretament damb Huesca, ua relacion qu’entath govèrn d’Aran ei de vitau importància mantier e suenhar, pr’amor que consideram qu’ei era melhor forma d’abordar uns rèptes compartits en matèries coma eth desvolopament territoriau, es comunicacions e eth suenh as persones”, afirmaue era sindica d’Aran.

Pendent aguesta amassada an tractat sus era actuau situacion dera N-230. En aguest sens, era sindica e eth president dera Deputacion Provinciau de Huesca an acordat sollicitar, amassa damb eth president dera Deputacion de Lleida, Joan Talarn, e es comarques de Ribagorza de Huesca e Alta Ribagorça de Lleida, ua entrevista damb Xavier Flores, secretari generau de Infraestructures deth Ministri de Transpòrts, Mobilitat e Agenda Urbana (Mitma).

Tanben an parlat sus era candidatura olimpica des JJOO d’iuèrn de 2030, ahèr sus eth quau era sindica d’Aran a assegurat que: “ei volontat deth Conselh Generau d’Aran que sigue ua candidatura guanhadora e conjunta de tot eth Pirenèu catalan e aragonés, e contunharam trabalhant coma ua institucion activa entà artenher-la pr’amor dera grana oportunitat que supausarie entàs nòsti territòris”.

Atau madeish, andús s’an referit as projèctes de cooperacion transtermièra enes que participen autant eth Conselh Generau d’Aran coma dera Deputacion Provinciau de Huesca, damb era finalitat de cercar projèctes de desvolopament territoriau.