• Aguest maitin, era sindica d’Aran, Maria Vergés, amassa damb eth secretari generau entath Rèpte Demografic, Francés Boya, e acompanhada peth conselhèr d’Espòrts, Amador Marqués, s’a amassat damb eth president deth CSD, José Manuel Franco Pardo, entà tractar sus eth posicionament dera Val d’Aran coma territòri de referéncia en espòrts de nhèu

Era sindica d’Aran, Maria Vergés, e eth conselhèr d’Espòrts, Amador Marqués, acompanhadi peth secretari generau entath Rèpte Demografic, Francés Boya, an mantengut aguest maitin ua prumèra amassada telematica damb eth president deth Consejo Superior de Deportes (CSD), José Manuel Franco Pardo, damb qui an parlat sus diuèrsi ahèrs relacionadi damb es espòrts d’iuèrn de gran importància entath nòste territòri.

Pendent aguesta trobada, s’a parlat sus era importància qu’a entath Pirenèu en generau, e entara Val d’Aran en particular, era candidatura des Jòcs Olimpics d’Iuèrn de 2030, pr’amor qu’ua oportunitat d’aguestes dimensions ajudarie a generar en nòste territòri un gran impuls en desvolopament non sonque esportiu, senon tanben sociau e territoriau.

Eth president deth CSD a mostrat era sua volentat de trabalhar e collaborar damb eth Conselh Generau d’Aran entà arténher qu’era Val d’Aran esdevengue un territòri damb un posicionament de referéncia enes espòrts de nhèu. Eth e era sindica s’an emplaçat a iniciar ua sèrie d’amassades de caractèr tecnic entà trabalhar ena possibilitat qu’era Val d’Aran acuelhe un centre de naut rendiment en espòrts d’iuèrn.

Pera sua part, Vergés a arregraït “ath president deth CSD aguesta trobada” e a destacat “eth valor qu’a entath Conselh Generau d’Aran poder desvolopar politiques e accions qu’ajuden a potenciar es espòrts de nhèu en Aran, pr’amor dera relevància qu’an non sonque a nivèu sociau e esportiu, senon tanben a nivèu economic”.

En aguest sens, era sindica d’Aran tanben a volut destacar eth trabalh conjunt que’eth Conselh Generau d’Aran amie a tèrme amassa damb era RFEDI entà desvolopar es espòrts d’iuèrn en nòste territòri.