• En aguesta trobada, era sindica d’Aran a trasladat ath Secretari d’Estat era complèxa situacion que patís era Val d’Aran per çò que hè ar accès ar abitatge e an acordat abordar conjuntament possibles vies de collaboracion entre er Estat e eth Conselh Generau d’Aran tà implementar mesures concrètes qu’ajuden a palliar aguesta situacion
Era sindica d’Aran, Maria Vergés, s’a amassat aué en Madrid damb eth secretari d’Estat d’Abitatge e Agenda Urbana, David Lucas, a qui a trasladat era preocupacion deth govèrn d’Aran pera situacion provocada pera manca d’abitatge accessible en nòste territòri. Ua problematica qu’afècte non sonque tàs residents locaus, senon que tanben empedís eth desvolopament sostenible dera comunautat aranesa e met en risc era prestacion de servicis publics.
Era sindica d’Aran a explicat ath secretari d’Estat que “eth govèrn d’Aran a impulsat, amassa damb bona part des ajuntaments aranesi, eth “Plan d’Abitatge d’Aran”, qu’entre d’autes donades, a metut de manifèst que sonque eth 38% der abitatge existent en Aran se dedique a abitatge abituau, en tot deishar ath descubèrt un gran nombre d’abitatges destinadi a segones residéncies e a usatge toristic, que provòquen un increment des prètzi deth loguèr, que s’an doblat en un an”.
En aguest sens cau rebrembar qu’eth govèrn d’Aran hè temps que reclame ara Generalitat de Catalunya deth traspàs deth domèni competenciau que n’aguesta matèria reconeish era Lei de Regim Especiau dera Val d’Aran.
Era sindica d’Aran a manifestat tanben eth besonh qu’es administracions superiors tròben ua formula normativa que balhe eth supòrt de besonh as ajuntaments e institucions competentes tà regular e limitar eth sector dera viuenda toristica, entà facilitar er accès ar abitatge en territòris tant tensionadi coma era Val d’Aran.
Atau madeish, era sindica d’Aran e eth secretari d’Estat, an acordat cercar formules de collaboracion conjunta tà desvolopar accions concrètes ena matèria pr’amor qu’era Lei de Regim Especiau d’Aran permet ath Conselh Generau establir acòrds e convènis damb era administracion der Estat.
Eth govèrn d’Aran sollicitaue, eth passat mes de gèr, ath govèrn der Estat era revision en marc de reconeishement dera tipologia de municipis tensionats entà includir aqueri que per caractèr toristic an limitat er accès ar abitatge a collectius vulnerables en ua missiva que tanben hège a arribar ath govèrn dera Generalitat de Catalunya. Ua declaracion coma territòri tensionat que, atau e coma remèrque era lei, correspon ara administracion competenta, que n’aguest cas ei era pròpria Generalitat. Hè ues setmanes, eth govèrn de Catalunya en foncions anonciaciaue qu’eth municipi de Vielha e Mijaran serie declarat municipi tensionat, quauquarren qu’encara non s’a oficializat.
Vielha, 21 de mai de 2024