• En aguesta trobada, an tractat ahèrs relacionadi damb eth traspàs de competéncies en matèria de cultura e lengua e era inversion en nau centre culturau dera Val d’Aran

• Eth passat mes de hereuèr era sindica d’Aran hec arribar ara conselhèra de Cultura dera Generalitat ua prepausa tath bastiment d’aguest centre culturau, un espaci fòrça de besonh en territòri entà poder amiar a tèrme activitat culturau e balhar supòrt ara creacion e ath nombrós teishit associatiu culturau aranés

Era sindica d’Aran, Maria Vergés, a mantengut aguesta tarde ua amassada tecnica damb eth secretari generau de Cultura dera Generalitat, Jordi Foz, era subdirectora generau d’Òbres, Mercè Martínez, e era directora de Servicis Territoriaus de Cultura en Naut Pirenèu e Aran, Rosa Isabel Noray, entà tractar ahèrs relacionadi damb eth traspàs de competències en matèria de cultura e lengua e era inversion en nau centre culturau dera Val d’Aran.

“Deth govèrn d’Aran ençà dejà auem expressat en nombroses ocasions era importància qu’an era cultura e era lengua entath desvolopament e mantenement dera nòsta singularitat e autogovèrn” manifestaue era sindica d’Aran, en tot híger que: “ei vitau qu’eth Conselh Generau d’Aran pogue desvolopar es sues competéncies damb es garanties e recorsi de besonh en aguest airau. Entà nosati ei primordiau poder desvolopar politiques culturaus que dinamizen era cultura en Aran, que balhen supòrt as entitats sociaus que se dediquen ad aguest prètzhèt e que servisquen tanben coma motor e supòrt ara perviuença e normalizacion der aranés”.

Era sindica d’Aran hèc arribar en mes de hereuèr ara conselhèra de Cultura dera Generalitat ua prepausa tath bastiment d’un Centre Culturau ena Val d’Aran, concrètaments en Vielha, a on er Ajuntament de Vielha e Mijaran a cedit ua parcèlla tad aguest prètzhèt.

Ena amassada mantenguda aguesta tarde, era sindica a trasladat eth besonh de qu’aguest projècte compde damb ua inversion importanta pr’amor que: “era Val d’Aran ei des pògui, se non er unic, territòri de Catalunya que non compde damb un espaci a on poder amiar a tèrme activitat culturau e balhar supòrt ara creacion e ath nombrós teishit associatiu culturau aranés” e a destacat que: “eth bastiment d’un Centre Culturau en territòri ei ua demana istorica dera Val d’Aran”.