• Acompanhada pes presidents des Deputacions de Huesca e Lleida, Miguel Gracia e Joan Talarn, e des presidents des comarques dera Ribargoça catalana, Mª José Erta, e aragonesa, Marcel Iglesias, era sindica d’Aran, Maria Vergés, assistic ager en Madrid a ua amassada de trabalh damb eth Secretari Generau d’Infraestructures der Estat, Xavier Flores, entà tractar sus era situacion dera N-230 e ena qu’acordèren trabalhar conjuntament ena sua melhora

Ager en maitin era sindica d’Aran, Maria Vergés, amassa damb es presidents des deputacions de Huesca e Lleida, Miguel Gracia e Joan Talarn, e des presidents des comarques dera Ribargoça catalana, Mª José Erta, e aragonesa, Marcel Iglesias, mantenguèc ua trobada de trabalh damb eth Secretari Generau d’Infraestructures der Estat, Xavier Flores, entà plantejar possibles solucions ara melhora dera carretera N-230 e debàter sus es projèctes en cors ath respècte d’aguesta via.

Pendent era trobada s’acordèc abordar, de forma priorizada e consensuada damb eth territòri, es actuacions de besonh entara melhora d’aguesta via que se trape entre ua des mès perilhoses der Estat.

Atau madeish, totes es parts coincidiren en besonh de completar e resòler era problematica generada peth pas de veïcles pesadi ena N-230 enquiara Val d’Aran en tot melhorar-ne era foncionalitat e es condicions de seguretat. En aguest sens, s’acordèc per part deth Ministèri de Transpòrts, Mobilitat e Agenda Urbana, dessenhar un calendari d’actuacions e projèctes a amiar a tèrme que se presentarà enes pròplèu setmanes en ua naua amassada entre es representants des territòris pes que passe aguesta via.

Entara sindica d’Aran aguesta trobada “a estat fòrça importanta pr’amor que non tostemp se ten en compde era opinion e era veu deth territòri, d’Aran en aguest cas, e encetam ua naua etapa qu’a de perméter que, en non massa temps, se poguen començar a veir actuacions de melhora dera N-230 qu’ajuden a melhorar-ne era seguretat e era sostenibilitat ambientau e territoriau”, atau madeish era sindica d’Aran a volut “arregraïr era bona predisposicion deth Secretari Generau que coneish ben era nòsta realitat, atau coma des presidents des deputacions e comarques damb es que trabalham de forma conjunta en aguest ahèr”.