• Pendent era trobada, era sindica d’Aran a expausat ath coordinador nacionau d’UP era volontat deth Conselh Generau de crear enes pròplèu setmanes ua taula de trabalh formada pes sindicats agraris, es associacions ramadères araneses e membres deth Conselh Generau d’Aran, entà tractar e definir quin a d’èster eth modèl e eth futur dera ramaderia dera Val d’Aran

Aguest maitin era sindica d’Aran, Maria Vergés, acompanhada deth conselhèr de Territòri e Paisatge, Francés Bruna, an recebut ena sedença deth Conselh Generau d’Aran ath director adjunt d’Unió de Pagesos (UP) de Catalunya, Jaume Clua, eth coordinacior nacionau d’UP, Joan Caball, e era responsable deth sector sociau hemnes d’UP, Raquel Serrat.

En aguesta trobada s’an tractat ahèrs d’importància tath sector ramadèr coma aqueri que tanhen as dificultats que provòque era aplicacion dera normativa actuau en zònes de montanha e es accions de supòrt ara ramaderia aranesa que realize eth Conselh Generau d’Aran coma es projèctes innovadors coma er hilat de cobertura LORA damb aplicacion en sector ramadèr, era creacion des ajudes ath bestiar non retornat, era metuda en foncionament de plans pilòt entà melhorar era conviuença damb era fauna sauvatja o era gestion e tramitacion des ajuts PAC e Leader, es convènis damb es associacions de ovin, crabum e equin o es incentius des hèires ramadères, que supauen un totau d’1.146.000 € d’ajudes destinades ara ramaderia, procedents de hons europèus, dotacions dera Generalitat e hons pròpris deth Conselh Generau d’Aran.

En aguest sens, Conselh Generau e UP an convengut trabalhar conjuntament entà definir es besonhs dera ramaderia en Aran, establir es collaboracions oportunes e daurir vies de dialòg e debat damb eth sector.

Era sindica d’Aran a volut “arregraïr era predisposicion de UP a trabalhar en aguesta linha qu’a de perméter impulsar solucions e naues propòstes tà consolidar un sector essenciau tath país coma ei era pagesia e era ramaderia”.