• Era sindica d’Aran e eth conselhèr d’Economia, Torisme e Promocion Economica an recebut aué ath president dera associacion Los Pueblos más Bonitos de España, damb qui an analizat eth positiu impacte que viuen es pòbles que se higen ad aguest hilat, coma ei eth cas de Bagergue, e an mostrat er interès deth govèrn d’Aran de trabalhar entà veir se d’auti pòbles dera Val d’Aran pòden arténher tanben aguesta certificacion

Era sindica d’Aran, Maria Vergés, s’a entrevistat aguest maitin ena sedença deth Conselh Generau d’Aran damb eth president dera associacion de Los Pueblos más Bonitos de España, Francisco Mestre, ua amassada qu’a compdat tanben damb era intervencion deth conselhèr d’Economia, Torisme e Promocion Economica, Josep Canut, e eth president dera EMD de Bagergue, Marc Tarrau.

En an 2019, Bagergue siguec proclamat un des Pòbles mès Polidi d’Espanha, ua certificacion de grana importància pr’amor dera marca de qualitat que represènte aguesta entitat.

“Dempús deth positiu impacte e era projeccion toristica generada en Bagergue damb era sua certificacion, deth govèrn deth Conselh Generau d’Aran ençà trabalham entà veir se d’auti pòbles dera Val d’Aran pòden entrar a formar part d’aguest hilat tan important”, afirmaue era sindica d’Aran, en tot destacar que “higer-se ad aguest projècte va en linha damb eth nau plantejament de sostenibilitat toristica que deth govèrn aranés ençà prebotjam, pr’amor que mos ajudarie a meter en valor er auviatge, cultura e istòria des nòsti pòbles”.

Aguesta associacion a coma principau objectiu méter en valor e dar votz a zònes preferentament ruraus e de petiti municipis e sajar d’implicar a diferentes administracions entà que les donguen supòrt e respecten eth sòn auviatge.

Era sindica d’Aran a volut “arregraïr ath president de Los Pueblos más Bonitos de España era sua visita e predisposicion a trabalhar de forma conjunta entà arténher qu’aqueri pòbles deth nòste territòri qu’atau ac volguen, poguen presentar es sues prepauses entà higer-se ad aguest hilat”.