• Pendent era trobada an tractat diuèrsi ahèrs coma era situacion actuau en Aran respècte dera reintroduccion der os o eth projècte de gestion forestau qu’impulse era maxima institucion aranesa e an acordat collaborar entà qu’eth Conselh Generau d’Aran age accès as diuèrses linhes d’ajuts deth Ministèri tara Transicion Ecologica e Rèpte Demografic

Aguest passat dimars en Madrid, era sindica d’Aran, Maria Vergés, s’amassaue dera man deth Secretari Generau tath Rèpte Demografic, Francés Boya, damb eth Secretari d’Estat de Miei Ambient, Hugo Morán, ena sedença deth Ministèri tara Transicion Ecologica e Rèpte Demografic (MITECO).

En aguesta trobada, era sindica d’Aran exposèc ath Secretari d’Estat es diuèrses accions qu’amie a tèrme eth Conselh Generau d’Aran en airau dera gestion ambientau, entre eres, eth projècte de gestion forestau que preten impulsar era bioeconomia e era gestion sostenibla des bòsqui en Aran. Atau madeish, Maria Vergés, expliquèc era forma ena qu’era maxima institucion aranesa desvolope es sues competéncies en matèria de gestion de fauna sauvatja e grani carnivòrs.

Era amassada servic entà que s’acordèsse ua collaboracion que permete, en base a un projècte que contemple era defensa còntra carnivors, era melhora de conviuença entre era ramaderia e era fauna sauvatja e er impuls dera digitalizacion en sector ramadèr, qu’eth Conselh Generau d’Aran age accès as diuèrses linhes d’ajut qu’eth MITECO destine tara gestion dera fauna sauvatja e der impuls dera bioeconomia.

“Voi arregraïr era atencion deth Secretari d’Estat que, tot e auer ua agenda fòrça complicada, a volut compartir ua estona entà conéisher es besonhs e rèptes qu’era Val d’Aran a en matèria ambientau” a declarat era sindica en tot híger que “aguest acòrd de trabalh conjunt en un projècte que dessenhe un equilibri sostenible entre era ramaderia e eth sòn impuls e era preséncia de fauna sauvatja en nòste territòri ei ua molt bona noticia, qu’ajudarà, per un costat entà poder compdar damb mès recorsi, e per aute a innovar e actualizar eth nòste modèl de gestion”.

Era sindica d’Aran a arregraït tanben era collaboracion e supòrt deth Secretari Generau tath Rèpte Demografic entà poder mantier contacte damb nauti cargues der Estat e auer era possibilitat d’explicar era realitat e es rèptes qu’a era Val d’Aran, atau coma encetar naues vies de collaboracion institucionau.