• Era sindica d’Aran s’a dirigit ara presidenta deth Parlament de Catalunya en tot sollicitar ua data ena que poder celebrar era compareishença annau dera sindica d’Aran, atau e coma establís era Lei de Regim Especiau d’Aran, entà dar a conéisher ath conjunt de Catalunya quina ei era situacion actuau deth nòste territòri e es sòns besonhs

Era sindica d’Aran, Maria Vergés, s’a adreçat ara presidenta deth Parlament de Catalunya, Laura Borràs, entà sollicitar qu’era compareishença annau dera sindica pogue amiar-se a tèrme pendent es pròplèu setmanes abans d’acabar er an, coma estabís er article 80.2 dera Lei d’Aran, que dicte que: “aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària que correspone”, un debat qu’atau coma dicte era lei “a de començar damb ua exposicion deth sindic o sindica d’Aran”.

“Aguesta compareishença ei un ahèr primordiau entà Aran e era sua maxima institucion, pr’amor que permet dar a conéisher quina ei era situacion actuau deth nòste territòri e es sòns besonhs”, explicaue era sindica d’Aran ena sua missiva dirigida ara presidenta deth Parlament.  Atau madeish, era sindica a remercat eth besonh de que “aguesta compareishença servisque tanben entà qu’eth Parlament de Catalunya daurisque un debat sus era situacion dera Val d’Aran”.

Eth passat 14 d’octubre de 2020, ar alatvetz sindic Francés Boya amiaue a tèrme era prumèra compareishença deth sindic en Parlament, dera aprovacion dera Lei d’Aran en 2015 ençà,  en tot expausar era situacion que trauessauen ahèrs tant primordiaus entath nòste territòri coma era lengua, era sanitat, era viuenda, eth desplegament dera Lei d’Aran e er estat des competéncies que depenen dera Generalitat de Catalunya e son pendentes d’èster traspassades ath govèrn deth Conselh Generau d’Aran, entre d’auti.

Era sindica d’Aran a demanat tanben ara presidenta deth Parlament “atau coma dejà comentèrem ena mia visita eth passat 7 de junh, que mos agradarie qu’eth Parlament acuelhe era exposicion deth Conselh Generau d’Aran sus eth 30 aniversari dera recuperacion dera nòsta maxima institucion, coma ua forma d’apropar Aran, eth sòn autogovèrn e era sua realitat a Catalunya e as sòns representants laguens d’aguesta cramba”.