Imatge: Parlament

• Maria Vergés, sindica d’Aran, s’a adreçat ara presidenta deth Parlament entà concretar ua data tara compareishença annau atau e coma mandate era Lei de Regim Especiau d’Aran entà debàter sus era situacion actuau deth nòste territòri e a demanat que pogue amiar-se a tèrme en sen deth Plen deth Parlament, entà qu’esdevengue un vertadèr debat en qu’es pròpris grups parlamentaris poguen tanben presentar resolucions ath respècte

Era sindica d’Aran, Maria Vergés, s’a adreçat per carta ara presidenta deth Parlament de Catalunya, Anna Erra, entà sollicitar data tara compareishença annau dera sindica d’Aran en aguest darrèr trimesadèr der an. Atau madeish a sollicitat qu’aguesta pogue amiar-se a tèrme en sen deth pròpri Plen deth Parlament de Catalunya entà “qu’esdevengue un vertadèr debat en qu’es pròpris grups parlamentaris poguen tanben presentar resolucions ath respècte, en tot dar un pas mes en reconeishement e desvolopament institucionau d’Aran” manifestaue Vergés.

Era Lei de Regim Especiau d’Aran mandate, en sòn article 80.2 que: “aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària que correspone”, un debat qu’atau coma dicte era lei “a de començar damb ua exposicion deth sindic o sindica d’Aran”.

Atau e coma assegure era sindica d’Aran ena sua missiva “aguest debat ei un hèt primodiau entà Aran e era sua maxima institucion, ja que permet hèr a conéisher quina ei era situacion actuau deth nòste territòri e es sòns besonhs de futur”.

Aguesta compareishença, tot e que ja ère reconeishuda ena modificacion dera Lei en 2015, s’amièc a terme per prumer còp en 2020, damb eth sindic Boya, permet daurir un debat tà expausar era situacion que trauèssen ahèrs tant primordiaus entath nòste territòri coma era lengua, era sanitat, era viuenda, eth desplegament dera Lei d’Aran e er estat des competéncies que depenen dera Generalitat de Catalunya e son pendentes d’èster traspassades ath govèrn deth Conselh Generau d’Aran, entre d’auti ahèrs.