Imatge: Parlament

• Maria Vergés, sindica d’Aran, s’a adreçat ath president deth Parlament, Josep Rull, entà mercar ua data entara compareishença annau atau e coma mandate era Lei de Regim Especiau d’Aran, en tot insistir en besonh qu’aguesta compareishença s’amie a tèrme en sen deth plen d’aguesta cramba entà esdevier un vertadèr debat en qu’es pròpris grups parlamentaris poguen presentar resolucions ath respècte, en tot dar un pas mes en reconeishement e desvolopament institucionau d’Aran.

• Era Lei d’Aran de 2015 contemple que, aumens un còp ar an, s’a de celebrar un debat sus era situacion d’Aran e eth desvolopament deth sòn autogovèrn ena cramba catalana, un hèt que se ven desvolopant de 2020 ençà .

Era sindica d’Aran, Maria Vergés, s’a adreçat per carta ath president deth Parlament de Catalonha, Josep Rull, entà sollicitar era sua compareishença annau entad darrèr trimesadèr der an. Atau madeish, a instat nauaments a qu’aguest pogue amiar-se a tèrme en sen deth pròpi Parlament, damb er objectiu qu’esdevengue un vertadèr debat en qu’es pròpis grops parlamentaris poguen dar resolucions respècte ara situacion actuau deth territòri e es sòns besonhs de futur, contemplades ena Lei deth Regim Especiau d’Aran, en tot dar un pas mès en reconeishement e desvolopament institucionau.

Era Lei de Regim Especiau d’Aran de 2015 mandate, en sòn article 80.2 que: “aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària corresponenta qu’a de començar damb ua exposicion deth sindic o sindica d’Aran, coma dicte era lei”.

Ena sua missiva, Maria Vergés,  assegure que: “ aguest debat ei un hèt primordiau entà Aran e era sua maxima institucion, ja que mos permet hèr a conéisher quina ei era situacion institucionau actuau en desvolopament dera Lei d’Aran en territòri e es sòns besonhs de futur, d’aquerò era importància  entà qu’aguesta intervencion  se pogue desvolopar en aguesti tèrmes”.

Aguesta compareishença, reconeishuda ena modificacion dera Lei d’Aran er an 2015, que s’amièc a tèrme per prumer còp en 2020 damb eth sindic Francés Boya,  servís entà daurir un debat d’expositiu en matèries primordiaus  tath territòri coma  era lengua, sanitat o viuenda ath delà de  tractar eth desplegament dera Lei de Regim Especiau d’Aran e er estat des competéncies que depenen dera pròpia Generalitat de Catalunya, a demora deth sòn traspàs definitiu ath govèrn aranés, ath delà tanben de presentar er estat e desvolopament der autogovèrn dera Val d’Aran.